18:21 07 İyul 2020 428
Ana səhifə Xəbərlər

Dövlət Vergi Xidməti: Bəzi şəxslərin ləğv olunan icazələri yenidən aktivləşdirilib

Nazirlər Kabinetinin 2020-ci il 19 iyun tarixli 208 nömrəli qərarı ilə fəaliyyətinə icazə verilən sahələr üzrə hüquqi və fiziki şəxslərin müraciətləri əsasında icazələrin aktivləşdirilməsi davam edir.

APA TV-nin xəbərinə görə, İqtisadiyyat Nazirliyi yanında Dövlət Vergi Xidmətinin şöbə rəisi Rəşad Qarayev bildirib ki, xidmətə daxil olan müraciətlər təxirə salınmadan araşdırılır və əsaslı müraciətlər üzrə vergi ödəyicilərinin “icaze.e-gov.az” portalında qeydiyyatdan keçməsinin mümkünlüyü barədə məlumat dərhal Vətəndaşlara Xidmət və Sosial İnnovasiyalar üzrə Dövlət Agentliyinə (“ASAN xidmət”ə) göndərilir: “Aparılmış araşdırmalar nəticəsində əvvəllər icazəsi olmuş, sonradan isə icazələrin verilməsi məhdudlaşdırılmış bir sıra hüquqi və fiziki şəxslərin müraciətləri əsasında onların vergi orqanlarının məlumat bazasında olan fəaliyyət istiqamətləri və təsnifat kodları ilə bağlı məlumatları yenidən dəqiqləşdirilib, uçot baza məlumatları yenidən işlənib, belə işəgötürənlərin və əlavə fəaliyyət istiqamətləri icazə verilən sahələrə daxil olan bir sıra hüquqi və fiziki şəxslərin işçilərinin sayına uyğun olaraq yol verilən limitlər çərçivəsində icazələrin aktivləşdirilməsi həyata keçirilib. Bununla əlaqədar hüquqi və fiziki şəxslərdən “icaze.e-gov.az” portalında icazələrinin aktivləşdirilməsini yenidən yoxlaması tövsiyə olunur”.

Rəşad Qarayev bildirib ki, xüsusi karantin rejimi tətbiq edilən dövrdə fəaliyyətinə icazə verilən, lakin “icaze.e-gov.az” portalında qeydiyyatdan keçə bilməyən sahibkarlıq subyektləri onlayn kargüzarlıq vasitəsilə Dövlət Vergi Xidmətinə müraciət edə bilərlər: “Sui-istifadə hallarının qarşısının alınması məqsədilə fəaliyyət istiqamətləri və təsnifat kodlarının dəqiqləşdirilməsi ilə bağlı hüquqi və fiziki şəxslərdən daxil olan müraciətlər yalnız araşdırıldıqdan sonra məlumatlarda dəyişiklik edilir. Hazırda hüquqi və fiziki şəxslərə icazələr Nazirlər Kabinetinin qəbul etdiyi müvafiq qərara əsasən fəaliyyətinə icazə verilən sahələr üzrə aktivləşdirilir, yeni icazələrin alınması ilə bağlı yaranan məsələlərin həlli real vaxt rejimində həyata keçirilir”.

Xidmət rəsmisi hazırda sistemin aktiv fəaliyyətinin təmin edilməsi üçün Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birlikdə iş aparıldığını da bildirib.

Müəllif | Apa.Tv

Apa.tv

Kodu kopyalayın