10:30 16 Yanvar 2021 70
Ana səhifə Xəbərlər

Şəhid Müqəddəsin son sözü: “Məni burada qoymayın!” - REPORTAJ

Xaçmaz rayonunun Dədəli kənd sakini Müqəddəs Qədirov 44 günlük Vətən Müharibəsində qəhrəmancasına döyüşərək şəhidlik zirvəsinə ucalan igidlərimizdən biridir.

APA TV-nin şimal bürosunun xəbərinə görə, Müqəddəs Nail oğlu Qədirov 1992-ci il mayın 14-də Xaçmaz rayonunun Dədəli kəndində dünyaya göz açıb.

Müddətdən artıq həqiqi hərbi xidmət keçən Müqəddəs Cəbrayıl və Füzulinin azad olunması uğrunda qəhrəmanlıqla döyüşüb. Oktyabrın 5-də xüsusi tapşırığın icrası zamanı snayper gülləsinə tuş gələrək şəhidlik zirvəsinə ucalıb.

İki ilə yaxın idi ailə həyatı qurmuşdu. Vətən yolunda canından keçən qəhrəman döyüşçünün Nur adlı 1 yaşında qızı yadigar qalıb.

Atası Nail Qədirov bildirib ki, hamı Müqəddəsi qayğıkeş, sədaqətli və ən əsası, vətənpərvər oğul kimi xatırlayır: “Müqəddəs hərbi xidmətini də cəbhə bölgəsində keçmişdi. Xidməti başa vurduqdan sonra hərbçi olmağa qərar verdi. Müharibənin ilk günündən döyüşlərə qatıldı. Ona ölüm barədə danışanda deyirdi ki, ata, hamımız bir dəfə ölürük. Vətən uğrunda ölmək daha şərəflidir. Yerini bizə demirdi. Döyüş yoldaşları deyir ki, Cəbrayılın azad olunmasında iştirak ediblər. Sonra Füzuli rayonu uğrunda döyüşlərə başlayıblar. Oktyabrın 5-də şəhid olub. Həmin döyüşdə 9 nəfər yaralanıb, Müqəddəs isə şəhidlik zirvəsinə ucalıb”.

Şəhidin anası Zöhrə Qədirova oğlunun ölümünün bütün kənd əhlini sarsıtdığını bildirib: “Deyirdi ki, ana, döyüşdə ölmək də var. Bircə sənin gözündə yaş görmək istəmirəm. Qayıdıb gələcəyəm. Evinə, ailəsinə çox bağlı idi. Onun ölümü bütün kəndimizi sarsıtdı. Hamı onun üçün ağladı. Dekabrda ailə həyatı qurmasının iki ili tamam oldu. Oğlum Füzuli uğrunda döyüşdə şəhid oldu. Döyüş yoldaşlarının dediyinə görə, meşədə pusquya düşüblər və yaxın məsafədən vurulub. Güllə qolundan keçərək ürək nahiyəsinə dəyib. Silahdaşına deyib ki, Talıbov, deyəsən, vuruldum, məni burada qoymayın. Onun son sözləri də elə bu olub. Sonra gözlərini əbədi olaraq yumub”.

Bacısı Gültəkin Niftəliyeva şanlı qələbədə pay sahibi olan qardaşı ilə qürur duyur: “Ailədə iki uşaq olmuşuq - qardaşım və mən. Qardaşım məndən böyükdür. Mən qardaşımla qürur duyuram, fəxr edirəm. O, əsl kişi idi, mərd idi. Döyüşlər səngiyəndə mənə zəng edirdi, deyirdi, narahat olmayın. Özü ən gərgin döyüşlərin getdiyi ərazilərdə olsa da, bizə ön xətdə olmadığını bildirirdi”.

Müqəddəs Qədirov sonuncu döyüşlərdən öncə telefonla qısa videogörüntü çəkərək ailəsinə göndərib. Həmin videoda fikrini “İnşallah, salamat qayıdarıq. Sağ-salamat qayıda bilməsəm, Vətən sağ olsun!” sözləri ilə tamamlayıb.

Şəhid əsgər Müqəddəs Qədirov oktyabrın 7-də Dədəli kənd qəbiristanlığında dəfn olunub. Ölümündən sonra “Vətən uğrunda” medalı ilə təltif edilib.

Vəli Turan

Mais Allahverdiyev

Müəllif | Apa.Tv

Apa.tv

Kodu kopyalayın