10:33 10 Fevral 2021 569
Ana səhifə Xəbərlər

Şuşada şəhid oldu, iki gün sonra müharibə bitdi - REPORTAJ

Ölümsüzlüyü ölümü ilə qazanan oğullarımızdan biri də ömrünün 33 payızında canı qədər sevdiyi vətənin azadlığı uğrunda döyüşlərə qatılan mayor Asiman Əliyevdir.

APA TV xəbər verir ki, Azərbaycan Silahlı Qüvvələrinin Vətən müharibəsində şəhid olan mayoru Asiman Vaqif oğlu Əliyev 1987-ci il fevralın 1-də Ordubad rayonunun Düylün kəndində dünyaya göz açıb.

Orta məktəbi doğulub boya-başa çatdığı kənddə alıb, hərbiyə olan həvəsi onu 2001-2004-cü illərdə isə Heydər Əliyev adına Hərbi Liseyə aparıb. Arzularının ardınca hərbi sirlərini daha dərindən öyrənmək üçün Heydər Əliyev adına Azərbaycan Ali Hərbi Məktəbinə üz tutub. Ali təhsilini burada motoatıcı taqım komandiri ixtisası üzrə alan Asiman Əliyev 2008-2009-cu illərdə Silahlı Qüvvələrin Təlim və Tədris Mərkəzində zabit ixtisası üzrə təhsil alıb.

Atası Vaqif Əliyev deyir ki, onun bu arzusuna qarşı çıxsa da, Asimanı seçdiyi yoldan geri döndərə bilməyiblər: “Vətən Müharibəsi başlayanadək əvvəl Mingəçevirdə, daha sonra Tərtərdə işləyib. 2016-cı ilin Aprel döyüşlərinin iştirakçısıdır. Aprel döyüşləri zamanı yanına iki dəfə minomyot mərmisi düşüb. Heç nə olmamışdı Asimana. Cəmşid Naxçıvanski adına liseydə kurs rəisi idi. Müharibənin qurtarmasına az qalmışdı, döyüş bölgəsinə ezam olundu. Noyabr ayının 3-ü cəbhəyə yollanan oğlum noyabrın 7-də şəhid olub. Xocavənd uğrunda gedən döyüşlər zamanı şəhidlik zirvəsinə ucaldı. Ölümündən 3 gün sonra da Vətən Müharibəsi qurtardı”.

Vaqif müəllim deyir ki, Asiman elə bil şəhid olacağını duymuşdu. Əvvəlcə rayonda çalışan atasını, sonra isə anasını yanına gətirib. Ailəsini bir araya toplayıb. Kursantlarını da övladı qədər sevərmiş Asiman, peşəsinə olan sevgisindən böyük zövqlə danışarmış: “Kaş hər zaman dövlətimizin bayrağı uca olsun. Allah Ali Baş Komandanımızı qorusun. Şükür bu günə, oğlumun oğlu böyüyür - Vaqif Asiman oğlu”.

Asimanın 40 mərasimi günü anası oğlunun yoxluğuna tab gətirə bilmir, dünyasını dəyişir. Bacısı İmmi Əliyeva deyir ki, anamı heç nə ilə ovuda bilmədik: “Nə mən, nə də digər qardaşım anama təsəlli ola bilmədik. Deyirdi ki, Asiman mənim tək oğlum deyil, qardaşımdı, dostum, iş yoldaşım, bir sözlə, hər şeyim idi. O acı ilə yalnız 40 gün yaşadı. Dekabrın 15-də anamı da itirdik. Asiman mənim də güvənc yerimdi. Lap uşaq yaşlarımızdan məni qoruyardı. Asimanın yerini heç kim verə bilməzdi”.

Həyat yoldaşı Aysellə 11 il ömür-gün yoldaşı olub Asiman. Bir kənddə böyüyüb, eyni məktəbi bitiriblər. Tale onları Bakıda ali təhsil aldıqları müddətdə yenidən qarşılaşdırıb və bu sevgidən 3 övlad dünyaya gəlib: “Qayğıkeş ata idi. Əsl komandir idi. Vətən Müharibəsi başlayan gündən hər gün bir neçə dəfə deyirdi ki, “Bakıda qala bilmirəm, utanıram. Elə hey deyirdi yoldaşlarım cəbhədədir, onlar şəhid oldu. Mən qala bilmirəm”. Beləcə əmri gəldi. Noyabrın 3-dən getdi. Ayın 7-si səhər tezdən danışdıq. Hər şey yaxşıdır dedi, anamgilə de nigaran qalmasın. Bu, bizim son danışığımız oldu. Aprel döyüşləri zamanı bir il onun yanında olmuşuq. Bir ildə həftədə üzünü bir dəfə, bir saat görmüşük”.

Aysel xanım deyir ki, Asiman müharibəyə qatılmaq, cəbhə bölgəsinə getmək üçün tələsirdi. Sonuncu dəfə danışanda “övladlarım sənə əmanət” deyib. İndi Aysel xanımın ən böyük arzusu Asimandan yadigar qalan övladlarının uğuru ilə onun ruhunu sevindirməkdir.

Nail şəhid mayor Asiman Əliyevin 18 illik dostudur. Bu illər ərzində bir-biri ilə məsləhətləşmədən heç biri işi başlamayıblar, sözün əsl mənasında bu dostluq qardaşlığa çevrilib: “Tanrı taleyimizi elə bil cüt yazmışdı. Liseydən bir yerdəyik. Sinif yoldaşı olduq, otaq yoldaşı olduq. Ali Hərbi Məktəbə bir daxil olub, bir də məzun olduq. Xidmətimizi də eyni hərbi hissədə başladıq. Vətən Müharibəsinə mən ondan əvvəl qatılmışdım. İnanın, elə gün olmazdı mənimlə maraqlanmasın. Sonuncu dəfə ayın 7-də danışdıq. Tövsiyə etdim ki, Asiman, ehtiyatlı ol. Dedi, Nail, Vətənə veriləsi bir canımız var”.

Nilay ailəsinin ilk qız övladıdır. Qayğılıdır, danışdıqca kövrəlir, əzizləri görməsin deyə göz yaşlarını gizlədir. Atası üçün darıxdığını deyir: “Mən atam şəhid olandan sonra onu yuxuda gördüm. Gördüm, deyir ki, ətrafım gül-çiçəkdir, Nilay, amma heç kimə demə. Mən də bu yuxu olduğu üçün anama danışdım. Bir də mən atamın ad gününə şeir hazırlamışdım. İndi onu da deyəcəm. (Şer deyir)” .

Vətən Müharibəsində Xocavəndin və Şuşanın azadlığı uğrunda gedən döyüşlərdə savaşan Asiman Əliyev noyabrın 7-də Şuşa döyüşləri zamanı şəhid olub.

Mayor Asiman Vaqif oğlu Əliyev sağlığında “Azərbaycan Silahlı Qüvvələrinin 90 illiyi” yubiley medalı, Azərbaycan Silahlı Qüvvələrinin 95 illiyi” yubiley medalı, "Azərbaycan Ordusunun 100 illiyi" yubiley medalı, III dərəcəli “Qüsursuz xidmətə görə” medallarına layiq görülüb. Ölümündən sonra isə “Vətən uğrunda” medalı ilə təltif olunub. Şəhid mayor II Fəxri Xiyabanda dəfn edilib.

SEVİNC VAQİFQIZI,

ƏLİ ƏLƏKBƏR,

APA TV

Müəllif | Apa.Tv

Apa.tv

Kodu kopyalayın