GÜNÜN ŞƏRHİ

 

Suriyada vəziyyət ərəb saçına dönüb. Qərb koalisiyası Suriyanı bombalayır. Rusiya da Suriyanı bombalayır. Hər iki tərəf İŞİD mövqelərini bombaladığını iddia edir. Hər iki tərəf də qarşı tərəfin İŞİD mövqelərini bombalamadığını deyir. Türkiyənin baş naziri Davudoğlu bu fikirdədir. Onun iddiasına görə Rusiya 57 hədəfə zərbə endirib, bunlardan yalnız  ikisi İŞİD mövqeləridir. Hərbi ekspertlərin apardığı təhlil bu məsələdə Qərbin daha səmimi olduğunu göstərir. Rusiya əsasən, hərbi bazasının yerləşdiyi Tartus və Latakiya bölgələri ətrafına zərbələr endirir, bu bölgədə İŞİD deyil, Özgür Suriya Ordusu, “Ən Nüsra Cəbhəsi” və digər silahlı birləşmələr mövqe tutub. Qərb koalisiyası son 15 gündə Suriyada on beş fərqli mövqeyə zərbə endirib, bunların hamısı İŞİD və Hizbullahın mövqeləridir. Maraqlı məqam başqadır. Suriya ərazisinin təxminən 15 faizi PKK terror təşkilatının Suriya qanadı olan YPG-nin nəzarətindədir. Son 15 gün ərzində nə Qərb koalisiyası, nə Rusiya kürd birləşmələrin mövqelərinə bir zərbə belə endirməyib. Deyəsən, Qərblə Rusiyanın Suriyanın gələcəyi məsələsində tək ortaq nöqtəsi də kürd məsələsidir...