“Yığmamız üçün İtaliya və Bolqarıstan çətin rəqiblərdir. Xüsusilə də İtaliyanı qeyd edərdim. Çünki onlar qələbə qazanacaqları halda Avropa çempionatının final mərhələsinə vəsiqəni təmin edəcəklər. Lakin komandamızın son matçları yaxşı oyun göstərəcəklərinə ümid verir”.

 

Bu fikirləri APA TV-nin “APAsport” layihəsinin qonağı, “Neftçi”nin idman direktoru və Azərbaycan millisinin sabiq futbolçusu Vəli Qasımov deyib.

 

Təcrübəli mütəxəssis Azərbaycan millisinin Avro-2016-nın seçmə mərhələsi çərçivəsində İtaliya və Bolqarıstan yığmaları ilə görüşləri, həmçinin paytaxt təmsilçisinin Topaz Premyer Liqasındakı çıxışı barədə danışıb.

 

Vəli Qasımov müstəqillik tariximizdə UEFA kuboku çərçivəsində Moskva “Dinamo”sunun heyətində İtaliya komandalarına qol vuran ilk azərbaycanlı kimi tarixə düşüb. O, “Skuadra Adzurra” ilə bu günkü matçda uğurunu təkrarlaya biləcək futbolçunun olduğuna inandığını ifadə edib. Sabiq hücumçu ad açıqlamasa da, potensialı olan futbolçularımızın olduğunu deyib: “Bu matçlara bütün dünya baxır. Kim yaxşı oynasa, belə deyək, Avropaya yolu açılır. Mən də həmin vaxt “Torino”ya qarşı oynayanda “Eurosport” göstərirdi və rəqibə qarşı yaxşı çıxış etdim. Bu matçdan sonra mənə çox təkliflər gəldi”.

 

O bildirib ki, komandamız Berti Foqtsun dönəmi ilə müqayisədə daha gözəl futbol göstərir. Vəli Qasımov almaniyalı çalışdırıcının xələfi Robert Prosineçkinin işini sevdiyini və Azərbaycan futboluna xeyri dəyəcəyini qeyd edib.

 

İdman direktoru almaniyalı çalışdırıcının vaxtilə milliyə dəvət etdiyi əcnəbilərin bu gün komandamızda “görünməməsinə” də münasibət bildirib: “Berti Foqtsun sistemi tam başqa idi və bu səbəbdən də ola bilsin azərbaycanlı futbolçuları heyətdə görmürdü. Öz sisteminə uyğun futbolçular gətirirdi. Bu gün isə öz oyunçularımızın potensialı böyükdür”.

 

“Neftçi”də potensiallı futbolçuların olduğunu vurğulayan sabiq hücumçu gələcəkdə bunun sayının daha çox olacağını deyib.

 

O, idman direktoru kimi Braziliyaya işgüzar səfərindən də danışıb: “A komandalarını, U-20 çempionatını izlədik. Rəsmi olaraq, “Fluminense” klubu ilə danışıqlar apardıq. Bu yaxınlarda da onların koordinatoru Bakıya gələcək. Yaxşı planlarımız var. Onlar ölkəmizə gəldikdə, hər şeyi konkretləşdirib, əməkdaşlıq müqaviləsi imzalayacağıq”.

 

Vəli Qasımov Braziliyada yeni futbolçular “gözaltı” etdiklərini də açıqlayıb: “Biz elə komanda yaratmaq istəyirik ki, gənc futbolçularımız onlardan nəsə öyrənsinlər. Həmçinin azərbaycanlı oyunçularımızın potensialını üzə çıxarmaq da planlarımıza daxildir”.

 

Azərbaycanda Müşahidə Şurasını ilk olaraq Neftçi yaradıb. Vəli Qasımov klubdakı yeni sistemi əvvəlki ilə müqayisə edərək, üstün tərəflərindən danışıb: “Biz qərarı artıq birgə veririk. Təbii ki, bu da futbolumuza böyük xeyir verəcək. Yəni qərar bir adam tərəfindən qəbul edilmir və bəzən geniş müzakirələrə səbəb olur”.

 

“Neftçi”nin idman direktoru komandasının çıxışına da toxunub. O bildirib ki, mövsümə çox yaxşı başlamasalar da, gələcəyə böyük ümidlə baxırlar: “Bilirdik ki, yeni komanda yaradırıq, hərənin öz yerini axtarırıq. Bu futbolçulara stabil oynamaq üçün bir az vaxt lazımdır. Hazırda da məhz stabilliyin çatmaması hiss olunur. Amma inanıram ki, komandamızda yer alan futbolçular potensiallarını göstərə biləcəklər”.

 

“Ağ-qaralar”ın rəsmisi bir müddət öncə azarkeşləri ilə aralarında yaranmış problemlərə aydınlıq gətirib: “Onları başa düşürük, həmişə qələbə qazanmağımızı istəyirlər. “Neftçi”nin adı elədir ki, daima qalib gəlməlidir. Onlarla görüşüb planlarımız və strukturumuz barədə məlumatlar vermişik. Bu gün biz də nəticə istəyirik. Düzdür, 90 dəqiqənin hamısını yaxşı oynamırıq, haradasa 25-30 dəqiqə “çatdıra” bilmirik. Bunun üzərində çalışırıq ki, hər şey 100 faiz olsun. Komandamızın heyəti kimi, baş məşqçi Samir Əliyev gənc olsa da, öz işini sevir. Biz həmişə birgə oturub oyunla bağlı müzakirələr aparırıq. O özü də komandanın bu vəziyyətdən çıxacağına inanır. Əvvəlki kimi çempionluğa oynayan iddialı “Neftçi”ni görmək üçün qısa zaman lazımdır. Bu gün “Qarabağ”la “Qəbələ” çox yüksək səviyyədədir və biz çempionluğumuzu görmürük. Amma 3-cü yeri tutmaq istərdik. Buna da stabillik lazımdır. Qısa müddət sonra çempionluğa oynayacağıq”.

 

Vəli Qasımov Premyer Liqanın VII turu çərçivəsində keçirilən “İnter” - “Qarabağ” görüşündə Ağdam təmsilçisinin baş məşqçisi Qurban Qurbanovun qərarına da münasibət bildirib. Belə ki, həmin matçın son dəqiqələrində baş hakim “İnter”in qapısına penalti təyin etsə də, qərarın doğru olmadığını düşünən Qurban Qurbanov futbolçusuna topu kənara vurmağı tapşırmışdı: “Sözün düzü, futbol karyeramda görməmişdim ki, deyələr üstünə vur, əyri vur və ya qol vurma. Amma hakimlərin səhvləri bir az çox olduğundan belə alındı. İstərdim ki, düzgün hakimlik etsinlər. Referi də səhvə yol verə bilər. Ancaq elə epizodlar olur ki, bu zaman bir az şübhə yaradır”.

 

Tək “Neftçi” deyil, digər klubların da görüşlərində nəticəyə təsir edən hakim səhvlərini vurğulayan Vəli Qasımov komandasında az da olsa özünü xatırladan hücumçunun olduğunu açıqlayıb: “İspaniyadan gətirdiyimiz hücumçu (Antonio Salas Quintanı nəzərdə tutur - red.) maraqlı futbolçudur. Onun qol hissiyyatı çox yaxşıdır. Düzdür, hələ qol vurmayıb. İnanıram ki, o fərqlənsə, “ayağı açılacaq” və hər oyun ola bilsin, qol vuracaq”.