Bu gördükləriniz kiminsə ev, kiminin övlad sahibi olmaq arzusunun diləklərə, dualara çevrilmiş halıdır. Şıx Eyyub baba kimi tanınan bu pir arzularını gerçəkləşdirmək istəyən yüzlərlə insanın son ümid yeridir. Şıx Eyyub baba türbəsi Şamaxı-Bakı yolunun 10-cu kilometrliyində, Acı dərə (Hacı dərə) adlanan ərazinin yaxınlığında yerləşir. Şeyx Əyyub Babanın (1730-1796) nəsli Әrəbqədim kəndindəndir. O, Azərbaycanın tanınmış sufi şeyxlərindən, övliyalarından biri olub. Şıx Eyyub bir övliya kimi Şərq təsəvvüf tarixinə adını yazdıran azərbaycanlılardan biridir. Məzarı ziyarətgaha çevrilib. Məzarın üstündəki türbə 1832-ci ildə tikilib. Qəbiristanlıqda olan ikinci türbə Şıx Eyyub babanın oğlu molla Məhəmmədindir. Yerli insanlar övliya haqqında bir çox rəvayətlər bilir və rəvayətlərə inanırlar. Buraya üz tutan insanlar övliyanın hüzurunda şəfa tapacaqlarına inanırlar. Çin olan arzuların sahibləri isə bu pirin həyətindəki ağaca konfet asırlar. İlahiyyatçılar isə bildirirlər ki, Dinimiz ibadəti yalnız Allaha aid edərək yerinə yetirməyi əmr edir. Psixoloqlar isə bildirir ki, bunun əksəriyyəti cahil insanlar tərəfindən şişirdilmiş inanclardır. Müsahibimiz həmçinin, qeyd edib ki, insanlar həyatda bütün sədləri, çətinlikləri müxtəlif əlamətlərlə deyil, öz sağlam düşüncəsi və dərrakəsi ilə aşa bilərlər!

İlham Əhmədov, Taleh İbrahimov, APA TV