Bu görüntülər “Azər-Türk Med” klinikasının təhlükəsizlik kameraları tərəfindən lentə alınıb.

APA TV-nin məlumatına görə, kadrlarda gördüyünüz şəxslər mayın 11-də sözügedən klinikada rinoplastika əməliyyatı keçirən və dörd gün sonra ölən Arzu Süleymanovanın qohumlarıdır.

Onlar klinikanın rəhbərliyini və əməliyyatı keçirən cərrahı səriştəsizlikdə ittiham edirlər:

Mərhumun bacısı Könül Kazımova deyir ki, ona xəbər veriləndə artıq bacısının beyninə qan sızıbmış: “Mən ora gedən dedilər ki, artıq beyninə qan sızıb. Dedilər ki, istəyirsinizsə, aparın neyrocərrahiyyədə saxlayaq. Burada reanimasiya şöbəsi yoxdur, burada xəstəyə heç cür köməklik göstərilməyəcək. Yəni orada hər şərait var. Bunlar özləri təcili yardım çağıraraq bacımı neyrocərrahiyyəyə çatdırdılar. İki gün yarım qalır orada. Elə neyrocərrahiyyəyə çatanda mənim bacım artıq ölmüşdü. Bunlar isə onu aparata qoşmuşdurlar. Yəni ki, ölümünü bildirmirdilər bizə”.

Plastik əməliyyatdan sonra dünyasını dəyişən Arzu Süleymanova məhz burada, qarşısında dayandığımız “Azər-Türk Med” Klinikasında əməliyyat olunmuşdu. Biz də hadisəni araşdırmaq məqsədilə sözügedən klinikaya gəlmişik.

Klinikanın baş həkimi Fərhad İbrahimov bildirib ki, sözügedən əməliyyat mərhum Arzu Süleymanovanın “Azər-Türk Med” klinikasında keçirdiyi ilk belə əməliyyat deyil. Arzu xanım 2020-ci ilin sentyabrında da eyni həkim tərəfindən rinoplaskiya əməliyyatı olunub. Əməliyyatdan sonra burnunun xarici görünüşündən narazı qalan Arzu Süleymanova yenə təkrar əməliyyat olunmaq istəyib. Bu zaman klinika ona pulsuz əməliyyat olunmağı təklif edib.

Əməliyyatı həyata keçirən plastik cərrah Qumru Hüseynzadə bildirir ki, onun Arzu Süleymanova üzərində keçirdiyi əməliyyat normal şəkildə baş tutub və pasiyentin ölümünə səbəb AVM - arteriovenoz malformasiyadır: “Rinoplastika əməliyyatı öncəsi müayinələrdə beyin müayinəsi yoxdur. Dünyanın heç bir tibb protokolunda belə bir şey yoxdur. Onu biz etməli deyilik. Bu, nadir rastlanan damar patologiyasıdır. O da Arzu xanımda qeyd olunubdur. Rinoplastika burunda icra olunur və burunun ətrafında həyati əhəmiyyətli vacib bir orqan yoxdur. Yəni əməliyyatın fəsadı olaraq qansızma baş verə bilməzdi. Məsələn, əməliyyatın fəsadı olaraq pasiyentdə qanaxma olsaydı, travma olsaydı, başqa məsələ. Kompüter tomoqrafiyada xəstənin kəllə sümüklərində heç bir travmaya rast gəlinməyib. Əməliyyatdan sonra da qanaxma olmayıb. Bizim əməliyyatın heç bir fəsadı yoxdur. Biz onun AVM-inin olmasını bilmirdik və onu heç kim bilə bilməzdi. Xəstədə arteriovenoz malformasiyanın qanaması baş verdi. Bunun nəticəsində də xəstə dünyasını dəyişdi”.

“Norma” Hüquq Mərkəzinin direktoru, hüquqşünas Şamil Paşayev deyir ki, belə hallar zamanı əsasən klinikanın həmin əməliyyatı keçirməyə müvafiq avadanlığının olması, əməliyyatı həyata keçirən həkimin həqiqətən də ixtisaslı həkim olması kimi məsələlərə baxılmalıdır: “Ölümlə bu əməliyyat arasında səbəbli əlaqə müəyyən edilərsə və bu səbəbli əlaqə nəticəsində xəstənin ölümü baş verərsə, yəni xəstənin ölümünün həkimin səhvi nəticəsində baş verdiyi sübut olunarsa, bu halda həkimin barəsində Cinayət Məcəlləsinin 314-cü maddəsi ilə, yəni səhlənkarlıq, vəzifəli şəxsin öz işinə layiqi diqqət göstərməməsi, laqeyd yanaşması nəticəsində şəxsin ölməsi və digər ağır nəticələrə səbəb olmasına görə 2 ildən 5 ilə qədər azadlığın məhdudlaşdırılması və 5 ilə qədər azadlıqdan məhrumetmə növündə cəza təyin oluna bilər”.

Hüquqşünas deyir ki, hazırda həkim səhlənkarlığı səbəbi ilə baş verən ölüm hallarına görə nadir hallarda həkimlərin məsuliyyətə cəlb olunmasına rast gəlinir: “Azərbaycanda həkim səhlənkarlığı ilə bağlı olan cinayət işlərinin 98-99%-i, demək olar ki, mütləq əksəriyyəti həkimlərin xeyrinə həll edilir. Bunun da bir səbəbi ondan ibarətdir ki, məhkəmə-tibb ekspertiza idarəsi Azərbaycanda bir dənədir və o da Səhiyyə Nazirliyinin tabeliyindədir. Orada işləyən həkimlər də Səhiyyə Nazirliyinə tabedirlər. İndi yeni TƏBİB yaradılıb və bəzi həkimlər TƏBİB-in nəzarətindədir. Yəni bu iki ziddiyyətli məqam eyni mərkəzi icra orqanında - Səhiyyə Nazirliyində araşdırılır”.

Qeyd edək ki, mayın 11-də “Azər-Türk Med” klinikasında keçirdiyi plastik əməliyyatdan sonra Arzu Süleymanovanın səhhəti kəskin pisləşib. Daha sonra o, yerləşdirildiyi Respublika Neyrocərrahiyyə Xəstəxanasında mayın 15-də vəfat edib. Faktla bağlı Xətai rayon Prokurorluğunda Cinayət Məcəlləsinin 314.2-ci (səhlənkarlıq ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə cinayət işi başlanıb.

Həmidağa Məcidov,

Xəqani Hüseynov,

APA TV