Quba rayonunun Ərməki kənd sakinləri yolsuzluqdan şikayət edirlər. 2 minə yaxın sakinin istifadə etdiyi Ərməki – Alıc - Yuxarı Digah yolu uzun illərdir təmirsiz vəziyyətdə olduğundan sakinlər əziyyət çəkir. Bildirirlər ki, yayda tozdan, qışda palçıqdan yolda hərəkət etmək müşgülə çevrilir. Sakinlər yol probleminə görə, becərdikləri məhsulları bazarlara çıxarmaqda da çətinlik çəkdiklərini qeyd edirlər. Elə bu probleminə görə, kənddə yaşayan sakinlərin sayı da günbəgün azalır. Quba rayon icra hakimiyyətindən bildirildi ki, Ərməki-Alıc-Yuxarı Digah avtomobil yolu ilə bağlı müvafiq qurumlar qarşısında məsələ qaldırılıb. Yaxın gələcəkdə bu yolun da təmiri nəzərdə tutulub. Lakin dəqiq tarix hələ ki, bəlli deyil. Verilən vədlər reallaşarsa, yaxın gələcəkdə Ərməki, Alıc, Yuxarı Digah sakinləri də asfalt yoldan istifadə edə biləcəklər. Necə deyərlər, minə dözən, min birə də dözər. Odur ki, bir qədər də gözləməkdə fayda var.

Cəfər Talıb, APA TV, Quba