Şabranda təkər təmiri sexində usta bədbəxt hadisə nəticəsində ölüb. Hadisə Bakı-Quba yolunun Şabran rayonunun Dəvəçi kəndi ərazisindən keçən hissəsində yerləşən təkər təmiri sexində baş verib. Orada işləyən 24 yaşlı Rəfail Əzimov “Şaqman” markalı avtomobilin təkərinə hava doldurarkən təkər partlayıb. Nəticədə Rəfail Əzimov aldığı xəsarətlərdən hadisə yerində ölüb. Qeyd edək ki, bədbəxt hadisə nəticəsində həlak olan 24 yaşlı Rəfail Əzimov Vətən müharibəsinin iştirakçısı olub. Faktla bağlı Şabran rayon prokurorluğunda araşdırma aparılır.

Cəfər Talıb, APA TV, Şabran