Bakının uzun illərdir gözlənilən baş planı artıq təsdiqlənib. Paytaxtın 212,3 min hektarlıq bütün inzibati ərazisini əhatə edən layihənin 2040-cı ilə qədər yekunlaşması nəzrdə tutulur. Baş plan 4 prioritet hədəfə əsaslanıb. Bunlar şəhərin dayanıqlı inkişafı, şəhər və ətraf mühitin regenerasiyası, şəhərin memarlıq siması və tarixi irsə qayğı və yeni şəhər iqtisadiyyatıdır. Layihənin əsas məqsədi Bakının çoxmərkəzli və dayanıqlı şəhərə çevrilməsi, paytaxt iqtisadiyyatının yeni prioritet sahələrinin davamlı inkişafı üçün əlverişli şəraitin yaradılmasıdır. Baş plana əsasən, paytaxtda nəqliyyat sıxlığını azaltmaq məqsədi ilə mərkəzdən kənarlarda "Universitet şəhərciyi” yaradılacaq. Layihəyə görə, Bakı və Sumqayıt şəhərlərini birləşdirən yeni magistral avtomobil yolu inşa olunacaq. Yeni yeraltı və çoxmərtəbəli dayanacaqlar inşa ediləcək. Bundan başqa, Xırdalan şəhərinə metro xəttinin çəkilməsi də nəzərdə tutulur. Baş plan paytaxtda tikinti işlərinin aparılmasında da rol oynayacaq. Qeyd edək ki, Bakı şəhərinin Baş Planı 30 dekabr 2023-cü il tarixində Nazirlər Kabinetinin 504 nömrəli Qərarı ilə təsdiq edilib.

ORXAN ASLAN TURAL ƏLİZADƏ APA TV