FHN-nin tədbiri - gənclər yarışdı

Fövqəladə Hallar Nazirliyinin (FHN) Muğan Regional Mərkəzində məktəblilər arasında zona birinciliyi üzrə "Gənc xilasedici və yanğınsöndürən" yarışı keçirilib. Yarışda birincilik uğrunda beş mərhələdə - "Maneələr zolağı", "Kombinəedilmiş yanğın estafeti", "Axtarış-xilasetmə işi", "Komandaların təqdimatı" və "Gənc ekspertlər"  Şirvan şəhəri, Salyan, Neftçala, Saatlı, Sabirabad, İmişli, Biləsuvar və Hacıqabul rayonlarının orta məktəblərinin   komandaları mübarizə aparıblar. APA TV-nin xəbərinə görə, mərasimdə çıxış edən FHN-nin Muğan Regional Mərkəzinin rəisi, polkovnik-leytenant Mehman Axundov bu yarışların əhəmiyyətindən, yeniyetmə və gənclərin fövqəladə hallara hazırlıq səviyyəsinin yüksəldilməsindən, məktəblilərin şəxsi və ictimai təhlükəsizliyə məsuliyyətindən, gənc nəslə hərbi vətənpərvərlik ruhunun aşılanması və məktəblilər arasında sağlam həyat tərzinin təbliğindən geniş bəhs edib. Bildirilib ki, əsas məqsəd orta və ümumtəhsil müəssisələrinin şagirdləri arasında fövqəladə hallara hazırlıq sahəsində fiziki və intellektual səviyyənin yoxlanılması, məktəblilərdə şəxsi və ictimai təhlükəsizliyə yanaşma hissinin artırılması və gənc nəslin nümayəndələrinə sağlam həyat tərzinin təbliğidir.

 

Yarış orta və ümumtəhsil müəssisələrinin şagirdləri arasında fövqəladə hallara hazırlıq sahəsində fiziki və intellektual müsabiqələrdən ibarət olub. Ümumi nəticəyə görə Salyan rayon komandası birinci, Hacıqabul komandası ikinci, Şirvan komandası üçüncü yeri tutub.  Yarışda yer tutmuş komandalar kubok və fəxri fərmanlarla təltif olunublar.

 

Müəllif | Apa.Tv
Əlibəy Zeynallı