Mayın 29-da Astanada Avrasiya İttifaqının yaradılması barədə sənəd imzalanacaq. APA TV-nin məlumatına görə, Kremlin mətbuat xidmətinin yaydığı məlumatda deyilir ki, Rusiya, Belarus və Qazaxıstanın imzalamağı planlaşdırdığı müqavilə 2015-ci il yanvarın 1-dən qüvvəyə minəcək. "Müqaviləyə əsasən 3 ölkə malların, xidmətlərin, kapitalın və işçi qüvvəsinin azad şəkildə daşınması, iqtisadiyyatın energetika, sənaye, kənd təsərrüfatı və nəqliyyat sahələrində razılaşdırılmış siyasət həyata keçirmək öhdəliyini üzərilərinə götürürlər. Bununla da MDB məkanında ən böyük ümumi bazarın yaradılması prosesi başa çatacaq" deyə məlumatda bildirilir. Görüş zamanı Gömrük İttifaqı və vahid iqtisadi məkanın yaradılması məsələsinin də müzakirə edilməsi gözlənilir. Həmçinin başqa ölkələrin, o cümlədən Ermənistanın bu birliyə qoşulması məsələsi gündəmə gələcək. Ermənistan prezidenti Serj Sarkisyan artıq Astanaya gedəcəyini açıqlayıb.