"Rusiya "Avrasiya dramı" ilə Azərbaycanla bağlı məsələləri həll etməyə çalışır və bunun üçün Ermənistandan istifadə edir".

 

APA TV-nin məlumatına görə, bunu Ermənistanın "İrs" partiyasının baş katibi Stepan Safaryan deyib. Onun sözlərinə görə, rəsmi Moskvanın bu addımı Ermənistanın alçaldılmasıdır. Rusiya xarici işlər naziri Sergey Lavrovun Bakıya səfəri ilə bağlı verdiyi açıqlamada Azərbaycanı Moskvanın strateji tərəfdaşı adlandırmasından narahatlığını ifadə edən  “İrs” partiyasının baş katibi bildirib ki, hazırda Ermənistan üçün fövqəladə təhlükəli vəziyyət yaranıb: "Bu isə normaldır. Rusiya bizi öz düşmənləri ilə əməkdaşlıq etməyə qoymur, amma özü düşmənlərimizlə tərəfdaşlıqdan imtina etmir".

 

O qeyd edib ki, Rusiya ilə Azərbaycan arasındakı münasibətlərin strateji tərəfdaş həddinə çatması üçün addımlar çoxdan atılıb: "Rusiya Azərbaycanı Qərbdən ayırmaq istəyir. Bu isə Ermənistandan fərqli olaraq çox çətindir. Rusiya prezidenti bir tərəfdən "Dağlıq Qarabağ"ın sərhədlərini təyin edilməsi məsələsini qaldırır, digər tərəfdən Azərbaycana müasir silah satır. Artıq sözün həqiqi mənasında Rusiya Azərbaycanı strateji tərəfdaş hesab edir".