Bürünc medal kimin olacaq?
İyulun 13-də Bakı vaxtı ilə saat 01:00-da baş tutacaq Braziliya-Hollandiya oyununu bütün azarkeşlər səbirsizliklə gözləyir. APA TV-nin məlumatına görə, XX dünya çempionatında üçüncü yer uğrunda oyunu hakim Camel Haymudi idarə edəcək. Bu, əlcəzairli hakimin mundialda idarə etdiyi dördüncü matç olacaq. 43 yaşlı Camel Haymudi bu turnirdə qrup mərhələsinin Avstraliya-Hollandiya (2:3), Kosta Rika-İngiltərə (0:0) və 1/8 final mərhələsinin Belçika-ABŞ (2:1) oyunlarını idarə edib. İndi isə oyun barədə.
Çempionatın bürünc medallarını boyunlarından asmaq arzusu ilə alışıb yanan braziliyalılar nəyə qadir olduqlarını sübut etməyə çalışacaq. Almaniya ilə oyunda yaşadığı biabırçılığı hər kəsə unutdurmaq istəyən ev sahibləri Hollandiya millisinə güclərini - daha dəqiq desək, özlərini təsdiq etməyə çalışacaqlar.
Lui Van Qalın komandası isə bu mundialda nəyə qadir olduqlarını ispanları 5 :1 hesabı ilə məğlub etməklə göstəriblər. Hollandlar Braziliyadan fəqli olaraq, 90 dəqiqəlik müddətdə məğlub olmayıblar. Yarımfinalda Arqentina millisinə də təyin olunan 11 metrlik zərbələrdən sonra boyun əyiblər. Van Qalın komandası topların fərqində də braziliyaları qabaqlayır. Meydan sahiblərinin Almaniyaya 1 : 7 məğlubiyyəti onların top fərqinə də təsir edib. Nə qədər acınacaqlı olsa da, braziliyalılar bu məğlubiyyətlə dünya çempionatları tarixində yarımfinal mərhələsində ən böyük hesabla uduzan komanda adını da qazanıblar.