İyulun 13-də keçiriləcək futbol üzrə dünya çempionatının final oyununa biletlərin qiymətləri "qara bazar"da 20 min dollara çatıb. Braziliyanın Rio De Janeyro şəhərindəki "Maracana" staionunda baş tutacaq Almaniya-Argentina qarşılaşmasını meydanda izləmək istəyənlər rəsmi qiymətlərdən dəfələrlə çox pul ödəməlidirlər. Biletlərin üzərində qiymətlərin 440-990 dollar arasında olduğu yazılsa da, 3 gün əvvələ qədər 12 min dollara yüksəlib. Oyuna 1 gün qalmış isə yerinə görə biletlər 5-20 min dollardan satılır.

 

Qiymətin bu qədər yüksəlməsinin səbəbinə gəlincə, bunun ABŞ-da final oyununa marağın həddən çox artması ilə əlaqəli olduğu bildirilir. Final qarşılaşmasının keçiriləcəyi "Maracana" stadionu 75 min nəfərlikdir. FİFA matçı stadionda izləmək istəyənlərinin sayının 750 min nəfər civarında olduğunu açıqlayıb.