Bakının Xəzər rayonunda ağır yol qəzası baş verib. APA TV-nin məlumatına görə, hadisə Maştağa-Buzovna yolunda, “Albalılıq” adlanan ərazidə qeydə alınıb. “Mercedes” markalı avtomobilin sürücüsü idarəetməni itirib və maşını yol kənarındakı işıq dirəyinə çırpıb. Nəticədə avtomobildəki sərnişin hadisə yerində dünyasını dəyişib. Qəzadan sonra  avtomobil alışmağa başlayıb. Ərazidə olan sakinlərin köməkliyi ilə avtomobil söndürülüb, yaralı sürücü və ölən sərnişinin meyiti avtomobildən çıxarılıb.

 

Ən qəribəsi də bundan sonra baş verib. VAZ-21011 markalı naməlum avtomobil hüquq-mühafizə orqanları əməkdaşlarının gəlişini gözləmədən meyiti və yaralı şəxsi hadisə yerindən uzaqlaşdırıb. Xəzər Rayon Polis İdarəsinin əməkdaşları meyitin və yaralı sürücünün axtarışlarına başlayıblar. Aparılan araşdırmalardan sonra istintaqçılar sürücü və sərnişinin şəxsiyyətini dəqiqləşdirə biliblər. Polis İdarəsindən APA TV-yə verilən məlumata görə, avtomobili 45 yaşlı Yaqub Həsənov idarə edib. Qəza nəticəsində dünyasını dəyişən sərnişin isə 44 yaşlı Etibar Quliyevdir. Hər iki şəxs Maştağa sakinidir.

 

İlkin ehtimala görə, qəzaya sürücünün sükan arxasına sərxoş vəziyyətdə əyləşməsi və avtomobili yüksək sürətlə idarə etməsi səbəb olub.

 

Faktla bağlı araşdırma aparılır.