Bu gün gecə saatlarında Xaçmaz rayonunda yol nəqliyyat hadisəsi baş verib. APA TV-nin şimal bürosunun verdiyi məlumata görə, Xaçmaz rayonu, Yergüc kənd sakinləri 21 yaşlı Əflatun Əsbədiyev və 17 yaşlı Sərdar Süleymanov  velosiped idarə edərkən maşın vurub.

Hər iki şəxs müxtəlif dərəcəli bədən xəsarətləri ilə Xaçmaz Mərkəzi Rayon Xəstəxanasına yerləşdirilib. Onların vəziyyətinin orta ağır olduğu bildirilir.

Hadisənin törədən Xaçmaz rayonu, Üçkün kənd sakini 24 yaşlı Abdullayev Nahib Cilovxan oğlu idarə etdiyi “VAZ 21011” markalı avtomaşını hadisə yerində qoyaraq qaçıb. Xaçmaz rayon Polis Şöbəsindən verilən məlumata görə, sürücü polis əməkdaşları tərəfindən saxlanılıb. Onun hadisə zamanı sərxoş olduğu bildirilir.

Faktla bağlı Xaçmaz RPŞ-də araşdırmalar davam etdirilir.