Masallıda qətl hadisəsi baş verib. APA TV-nin cənub bürosunun verdiyi məlumata görə, hadisə ötən gecə saat 23.00 radələrində rayonun Xırmandalı kəndində qeydə alınıb. Kənd sakini, 27 yaşlı Ramal Şirməmməd oğlu Muradov şəxsi münaqişə zəminində əmisi oğlanları - 26 yaşlı Zəbulla Muradov və 23 yaşlı Samin Muradov qardaşlarına bıçaqla müxtəlif dərəcəli bədən xəsarətləri yetirib. Xəstəxanaya yerləşdirilmiş Zəbulla Muradovun həyatını xilas etmək mümkün olmayıb. Samin Muradovun vəziyyəti isə orta-ağır qiymətləndirilir. Hadisəni törətmiş Ramin Muradov yaxalanaraq istintaq orqanlarına təhvil verilib. Faktla bağlı Masallı Rayon Prokurorluğunda cinayət işi başlanıb, araşdırma aparılır.