Mahaçqala şəhərindən Vətənə qayıdan Balakən rayon sakinləri yol qəzasına uğrayıblar, ölən və yaralananlar var. APA TV-nin məlumatına görə, hadisə Yevlax-Zaqatala-Gürcüstan sərhədi magistral yolunun Balakən rayonunun Katex kəndi ərazisindən keçən hissəsində baş verib. Balakən rayonunun Meşəşanbul kənd sakini, 48 yaşlı Drinçov Əziz Ramazan oğlu idarə etdiyi “Mercedes “markalı minik avtomobillə Balakən rayonu istiqamətində hərəkətdə olarkən, idarəetmənin itirilməsi səbəbindən maşını yolun kənarındakı beton işıq dirəyinə çırpıb. Qəza nəticəsində müxtəlif dərəcəli bədən xəsarətləri alan sürücü Ramazan Drinçov və avtomobildə olan digər sərnişinlər - Balakən rayonu Qaysa kənd sakini 54 yaşlı Cücüyev Əli Ramazan oğlu, Balakən rayonu Meşəşanbul kənd sakini 58 yaşlı Varşayeva Həlimət Ramazan qızı və Balakən rayonu Qaysa kənd sakini 52 yaşlı Hetayev İsa Məhəmməd oğlu Balakən Rayon Mərkəzi Xəstəxanasına çatdırılıb.

Yaralılardan Ramazan Dirçinovun həyatını xilas etmək mümkün olmayıb. O, xəstəxananın reanimasiya şöbəsində dünyasını dəyişib. Digər yaralılar - Əli Cücüyev, Həlimət Varşayeva və İsa Hetayev xəstəxananın cərrahiyə şöbəsinə yerləşdiriliblər, onların vəziyyətləri orta ağır qiymətləndirilir.

Faktla bağlı Daxili İşlər Nazirliyinin Baş Dövlət Yol Polisi İdarəsinin istintaq və təhqiqat bölməsində cinayət işi açılıb və araşdırma işi aparılır.