Cəlilabadda dəhşətli yanğın hadisəsi baş verib. APA TV-nin cənub bürosunun məlumatına görə, yanğın hadisəsi ötən gecə rayonun Əliabad kəndində qeydə alınıb.  Kənd sakini, 51 yaşlı Xeyrulla İltifat oğlu Diniyevə məxsus 3 otaq və bir dəhlizdən ibarət fərdi yaşayış evi alovlanmağa başlayıb. Yanğın zamanı evdə heç kim olmayıb. Hadisə barədə əvvəlcə ilk olaraq xəbər tutan qonşular. Fövqəladə Hallar Nazirliyinin Cəlilabad Rayon Yanğından Mühafizə Hissəsinə məlumat veriblər. Hadisə yerinə dərhal 2 yanğınsöndürən maşın və canlı qüvvə cəlb olunub. Onların səyləri nəticəsində güclü alov dalğasının yaxınlıqdakı yardımçı tiklilərə keçməsinin qarşısı alınıb. Yanğın zamanı xəsarət alan olmasa da, ümumi sahəsi 160 kvadratmetr olan fərdi yaşayış evinin 100 kvadratmetrlik ərazisi içindəki məişət əşyaları ilə birlikdə yanaraq yararsız hala düşüb.

   

Ev sahibinin qohumları deyiblər ki, evləri yanan ailə yeni toy edibmiş. Üç gəlinin cehizi, qızıl-zinət əşyaları, pulları yanıb.

 

İlkin versiya kimi yanğının elektrik naqillərindəki qısaqapanmadan baş verdiyi bildirilir.

 

Faktla bağlı araşdırmalar aparılır.