Nəsimi rayon Polis İdarəsinin 22-ci Polis Bölməsinin əməkdaşları cibgirlikdə təqsirləndirilən qadını həbs ediblər. Zaqatala rayonunda anadan olmuş 30 yaşlı Ülkər Əzizova onlarla insana qarşı cibgirlik cinayəti törətməkdə təqsirləndirilir. O, cinayətlərini paytaxtın müxtəlif ticarət mərkəzlərində həyata keçirib. Araşdırmalar zamanı müəyyən olunub ki, Ülkər Əzizova mağazalara daxil olaraq soyunub geyinmə otaqlarında qadın müştərilərin əl çantalarını soyub: "Ticarət mərkəzindəki mağazanın paltar dəyişilən yerindən müştərilərin ancaq pul kisələrini aparmışam".

 

O, Azadlıq prospektində yerləşən ticarət mərkəzindəki mağazanın paltar dəyişmə otağından Gülbəniz Cəfərovanın içərisində 800 manat, 400 ABŞ dolları və 3 ədəd kredit kartı olan əl çantasını, Xırdalan şəhər sakini İnci Talıbovaya məxsus mobil telefonu naməlum şəraitdə oğurlayıb. Bundan əlavə, Ülkər Əzizova Bakı şəhər sakinləri Afaq Həsənzadənin içərisində bankomat kartı, 480 manat, 400 türk lirəsi, 35000 rubl olan pul kisəsini, Bakı şəhər sakini Aynur Qiyasovanın içərisində 500 manat olan pul kisəsini, Lətifə Məmmədovanın içərisində 105 manat, 3 ədəd sim nömrə kartı olan pul kisəsini, Mahiyət Əzimovanın əl çantasından içərisində 262 manat olan pul kisəsini, Səbinə Süleymanovanın əl çantasından içərisində 37 manat olan pul kisəsini də eyni yolla oğurlayıb: "Şəxsiyyət vəsiqələrini, sənədləri götürmürdüm, hamısını mağazanın içinə atırdım".

 

Faktlarla bağlı başlanmış cinayət işinin istintaqı davam etdirilir. Bu şəxsi tanıyanların və ya əməllərindən zərərçəkənlərin 22-ci Polis Bölməsinə müraciət etmələri xahiş olunur.