İŞİD terrorçuları yezidi qadınların cariyə, kişilərin isə qul olaraq istifadə edildiyi barədə açıqlama yayıb. Terrorçular bunun dinə uyğun olduğunu bildirir. Onların fikrinə görə, xristianlar və yəhudilər bir müqəddəs bir kitaba və səmavi dinə mənsub olduğu üçün fidyə verərək azad ola bilər, şəriət hökmlərinə görə müəyyən hüquqlardan yararlana bilər. Yezidilər isə Allaha şərik qoşan müşrikdirlər.

 

Bu arada İŞİD-in Kobanidə irəliləyişinin dayandırılması barədə xəbərlər yayılıb. Kürd döyüşçülərin Till Şeir kəndindəki təpəni terrorçulardan azad etdiyi bildirilir. ABŞ və koalisiya qüvvələri Kobanidə İŞİD-in mövqelərini bombardman etməkdə davam edir. Təyyarələr gecə saatlarından bəri 15 hava hücumu həyata keçirib. Hücumların birində İŞİD bayrağı olan bina hədəf alınıb.

 

ABŞ-da isə ölkə prezidenti Barak Obama 20-yə qədər ölkənin yüksək səviyyəli hərbçiləri ilə İŞİD-lə mübarizə strategiyasını müzakirə edəcək. Qərbdə İŞİD-ə qarşı mübarizə  mövzusu müzakirə olunduğu vaxtda, şərqdən İŞİD-ə dəstək barədə xəbərlər yayılıb. Pakistanın Taliban sözçüsü Şahidullah Şahid özü və təşkilatın beş önəmli adamının Əbubəkir ıl-Bağdadiyə bağlılığı barədə yazılı açıqlama yayıb. Buna baxmayaraq, Pakistan Talibanının lideri Molla Fəzlullanın İŞİD lideri Bağdadiyə biət etmədiyi bildirilir.