Azərbaycan prezidenti İlham Əliyev yenidənqurma işlərindən sonra Qala-Pirallahı yolunun birinci hissəsinin açılışında iştirak edib. Nəqliyyat naziri Ziya Məmmədov görülən işlər barədə dövlət başçısına məlumat verib. "2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət proqramı"nın həyata keçirilməsi üzrə tədbirlər planına uyğun olaraq, yenidən qurulan yolun ümumi uzunluğu 22 km-ə yaxındır. Yolun 15 km-ə yaxın hissəsi artıq istismara tam hazırdır. Mövcud yol əvvəllər ensiz olduğu üçün hərəkətin intensivliyinə mane olurdu. Hazırda yolun hərəkətli hissəsinin eni 19 metrə yaxındır. Layihəyə əsasən qovşaqlar və piyada keçidləri də inşa olunub. İnşaat zamanı bütün kommunikasiya sistemləri, o cümlədən su, istilik, qaz, rabitə və yağıntı sularını axıdan xətlər dəyişdirilib.

 

Daha sonra prezident İlham Əliyev Pirallahı rayonuna səfər edib. Rayon İcra Hakimiyyətinin başçısı Vasif İmanov Pirallahıda görülən işlər və qəsəbənin baş planı ilə bağlı ətraflı məlumat verib.

Prezident İlham Əliyev Pirallahı adasını Abşeron yarımadası ilə birləşdirən yeni körpünün inşaat işləri ilə də tanış olub. Tikinti işlərinə 2012-ci ilin sonunda başlanılıb. Körpü Qala-Pirallahı yolunun 23-cü km-liyində yerləşir. Körpünün uzunluğu giriş-çıxış hissəsi arasında 710 metr, eni 14 metr, hərəkət hissəsi isə 12 metrə yaxındır. Körpüdə inşaat işlərinin xeyli hissəsi görülüb. İstismara verildikdən sonra onun altından gəmilərin hərəkəti nəzərdə tutulub. Prezident İlham Əliyev inşaat işlərinin yüksək səviyyədə aparılması üçün müvafiq tapşırıq və tövsiyələrini verib.

 

Daha sonra prezident Pirallahı rayonunun yeni şəhərin konseptual planı ilə tanış olub. İlkin olaraq yeni şəhər 120 min nəfərin yaşaması üçün nəzərdə tutulub. Layihəyə görə, ilkin mərhələdə 60 yaşayış binasının tikintisi nəzərdə tutulub.