Xətai Rayon Polis İdarəsinin əməkdaşları ev oğurluğu və çoxsaylı cibgirlik cinayətlərində şübhəli bilinən şəxsi yaxalayıb. APA TV-nin xəbərinə görə, əvvəllər də müxtəlif cinayətlər törətdiyinə görə 4 dəfə məhkum olunmaqla, 14 il həbsdə yatan Bakı şəhər sakini, 35 yaşlı Seyran Rəhimov sərnişin avtobusunda cibgirlik edib qaçmaq istəyərkən, cinayət başındaca tutulub.

 

İstintaq araşdırmaları ilə müəyyən edilib ki, Seyran Rəhimov son bir neçə ayda metronun “Əhmədli” stansiyası yaxınlığından şəhər istiqamətində hərəkət edən avtobuslarda çoxsaylı cibgirlik cinayətləri həyata keçirib. Saxlanılan şəxs etiraf edib ki, yalnız qadınlara məxsus əl çantalarını soyub. O, insanların sıx olduğu vaxtlarda avtobuslarda qadın sərnişinlərin çantalarındakı pul, telefon və digər qiymətli əşyaları oğurlayıb: «Marşrut avtobuslarda portmanatlar çıxarmışam. İçindən kartlar çıxıb, mobil telefon çıxıb, kimlik çıxıb. Onları kənara atmışam ki, tapıb götürsünlər. Mən ancaq pul götürmüşəm».

 

İstintaq araşdırmaları ilə daha sonra məlum olub ki, Seyran Rəhimov qonşusuna məxsus evdən də külli miqdarda pul oğurlayıb. Qonşunun işə getdiyini görən Seyran Rəhimov mənzilin eyvanına düşərək, pəncərədən evə daxil olub. O, yataq otağındakı şkafdan 6 min manat nağd pul götürdüyünü bildirib: «Axşam tərəfi idi, təxminən saat 6 olardı. Kişi də evdə yox idi. Balkondan girdim içəri. Köhnə mebelləri var idi. Qalxdım yuxarı, açdım şkafı, sellofana bükülmüşdü 6 min manat. Orada saymadım, gedəndən sonra yolda saymışam ki, 6 min manatdır».

 

Faktlarla bağlı cinayət işi başlanıb, istintaq saxlanılan şəxsin ətrafında araşdırmaları davam etdirir.