2016-cı il Avropa çempionatının seçmə mərhələsində Serbiya – Albaniya oyunu yarımçıq dayandırılıb. APA TV-nin xəbərinə görə, Belqrad şəhərində "Partizan" stadionunda keçirilən qarşılaşma cəmi 41 dəqiqə davam edib.

 

Oyunun yarımçıq qalmasına azarkeşlərin davranışı səbəb olub. Belə ki, UEFA-nın da ən təhlükəli hesab etdiyi qarşılaşmanın ilk yarısının sonunda qonaqb komandanın fanatları ölkələrinin bayrağını meydana endiriblər. Ev sahiblərinin futbolçusu bayrağı qopartmağa çalışıb. Bu zaman alban və serb oyunçuları arasında gərgin anlar yaşanıb. Serbiyalı fanatlar isə meydana yanan maddələr ataraq, Albaniyadan olan futbolçuları döyməyə çalışıb.

 

Görüşün İngiltərədən olan baş hakimi Martin Atkinson matçı dayandırıb.

 

Araşdırma nəticəsində məlum olub ki, futbol oyununda aranın qarışmasına Albaniyanın baş naziri Edi Ramanın qardaşı Orfi Rama səbəb olub. O, oyun zamanı xüsusi qonaqlar üçün tribunada imiş. Serbiya polisi Albaniyanın baş nazirinin qardaşını insidentin təşkilində şübhəli bilərək saxlayıb.

 

Qeyd edək ki, yarımçıq dayandırılan oyunda hesab açılmayıb.

 

Kosovo məsələsi üzündən serblərlə albanlar arasında gərginlik uzun illərdir davam edir. Bu səbəbdəb UEFA Belqrada qonaq azarkeşlərin getməsinə qadağa qoyub. Lakin minlərlə alban Serbiyanın paytaxtına yollanıb. Matçın başlama saatından əvvəl şəhərdə bir neçə toqquşma baş verib. Polis Belqradı tam nəzarətə götürmüşdü.