Bakının Nizami rayonunda üç nəfərin xəsarət alması ilə nəticələnən yol qəzası baş verib. APA TV-nin məlumatına görə, hadisə Babək prospektində qeydə alınıb. "Hyundai" markalı yük və "VAZ-2107" markalı minik avtomobillərin toqquşması nəticəsində üç nəfər xəsarət alıb.

 

İlkin məlumata görə, hər iki avtomobil Babək prospekti ilə "8-ci kilometr" qəsəbəsi istiqamətində hərəkət edirmiş. "VAZ-2107" prospektdən sağa - məhəlləarası küçəyə dönən vaxt sağ tərəflə hərəkət edən yük maşını onu vurub. Nəticədə VAZ-2107-nin sürücüsü Anar Bayramov və iki sərnişini xəsarət alıb. Xəsarət alanlar təcili tibbi yardım briqadası tərəfindən xəstəxanaya çatdırılıb.

 

Qəzanın səbəbinə gəlincə, "VAZ-2107"-nin sürücüsünün yaxınları iddia edirlər ki, maşın məhəlləarası yola dönərkən sağdan ötmə əməliyyatı həyata keçirən "Hyundai" onu vurub və təxminən 50 metr sürüyüb. "Hyundai"nin sürücüsü isə qarşı tərəfi günahlandırır. Onun dediyinə görə, sol tərəfdə hərəkətdə olan "VAZ-2107" sağa qəfil dönüş edib və bu zaman yük maşınının qarşısına çıxıb.

 

Faktla bağlı Nizami Rayon Polis İdarəsində araşdırma aparılır. Hadisədə günahın hansı sürücüdə olduğunu da istintaq müəyyən edəcək.