"Hər görüşdə ümidimiz ondan ibarət olur ki, bu Ermənistan-Azərbaycan, Dağlıq Qarabağ münaqişəni yerindən tərpədə biləcəyik".

 

APA TV-nin xəbərinə görə, bu sözləri xarici işlər naziri Elmar Məmmədyarov jurnalistlərə açıqlamasında deyib. Nazir Fransa prezidenti Fransua Olandın təşəbbüsü ilə bu ayın axırı Azərbaycan və Ermənistan prezidentlərinin görüşünün keçiriləcəyini qeyd edib: "Azərbaycanın mövqeyi ondan ibarətdir ki, biz "Böyük sülh sazişi" üzərində işləyə bilərik. Vaxt itirməmək üçün belə bir təklif var idi ki, struktur bölmələri ilə danışıqlar aparaq. Bunlar qoşunları çıxarmaq, nəqliyyat və digər məsələlərlə bağlıdır. Azərbaycan artıq öz razılığını verib. Ermənistanın cavabını gözləyirik. Onlar razılıq verən kimi biz belə bir struktur bölmələri ilə danışıqları başlaya bilərik".

 

Nazir Elmar Məmmədyarov regionda səfərdə olan ATƏT-in Minsk qrupunun həmsədrlərinin prezident İlham Əliyevlə görüşdüklərini deyib. Nazir Azərbaycan prezidentinin buradan Yerevana gedəcək həmsədrdən girov götürülmüş Şahbaz Quliyev və Dilgən Əsgərovun geri qaytarılmasını tələb etmək məsələsini qaldırdığını söyləyib: "Onlar Kəlbəcərdə doğulublar və öz vətənlərinə baş çəkiblər, onlara diversant demək bir oyundur".

 

Xatırladaq ki, bu gün Fələstinin xarici işlər naziri Riyad əl-Maliki Azərbaycanda rəsmi səfərdədir. Xarici İşlər Nazirliyində görüşdə iki ölkənin xarici işlər nazirlikləri arasında siyasi məsləhətləşmələr haqqında anlaşma memorandumu imzalanıb.