İŞİD terrorçu təşkilatı "halal" futbol çempionatı keçirəcək. Terrorçular bu xəbəri "Aljafer" televiziya kanalı vasitəsi ilə yayıb. Çempionatın ayın sonunda Liviya torpaqlarında keçiriləcəyi bildirilir. "Çempionat Liviyanın Derna şəhərində keçiriləcək. Dəqiq tarixi təhlükəsizlik baxımından açıqlamırıq. Çempionata Əfqanıstan, İraq, Misir, Suriya və Liviyadan futbolçular qatılacaq. Oyunçuların çoxu İŞİD-ə qatılmadan öncə professional idmançı olub. Bizim futbol çempionatında oyunun qaydaları fərqli olacaq. Şəriət hökmlərinə sadiq yeni qaydalar olacaq".

 

ABŞ isə Vaşinqtonda koalisiya ölkələrinin müdafiə nazirləri ilə ordu komandanlarını toplayıb İŞİD-ə qarşı mübarizə yollarını müzakirə edir. Görüşdə ABŞ prezidenti Barak Obama İŞİD-lə mübarizənin uzun sürəcəyini deyib. APA TV-nin xəbərinə görə, Obama bildirib ki, məqsəd İŞİD-i yox etmək və bir daha bölgəni təhdid edə bilməyəcək hala gətirməkdir. Bundan başqa ABŞ-ın İŞİD-lə hərbi mübarizə çərçivəsində Ərəb ölkələrindən quru qoşunları üçün dəstək istədiyi iddia olunur. "Rudav"ın xəbərinə görə, ABŞ və koalisiya qüvvələri təşkilatın Suriyadakı mövqelərinə quru qoşunları ilə hücum etmək yollarını arayır.

 

Suriyanın Kobani şəhərində isə terrorçu təşkilata endirilən zərbələr nəticə verməyə başlayıb. Raqqa İnqilabçıları sahə komandiri Əbu Seyf şəhərdə  İŞİD hücumlarının qarşısının alındığını bildirib. Onun sözlərinə görə, koalisiya qüvvələri ilk dəfə olaraq terrorçuların mövqeyini güclü şəkildə bombardman edib. Ötən gecə isə 27 hava hücumu həyata keçirilib. Əbu Seyf bildirib ki, bombardmandan sonra İŞİD bir daha hücum etməyib.