“TEAS Press” Nəşriyyat Evinin “3 alma” uşaq ədəbiyyatı bölməsi 20-dən artıq uşaq kitabının təqdimatını keçirib. Təqdim olunan kitabları “TEAS Press”in peşəkar yaradıcı heyəti tərcümə və dizayn edib.

 

APA TV-nin xəbərinə görə, tədbirdə çıxış edən “Üç alma” uşaq ədəbiyyatı bölməsinin rəhbəri Kolin MakDonell bildirib ki,  “TEAS Press”in sayəsində Azərbaycanda uşaq ədəbiyyatı ilə bağlı mütərəqqi addım atılıb. Nəşriyyat evi uşaqlarda qiraətə maraq yaradan kitabları seçərək tərcümə edib. "İnanırıq ki, bu kitablar valideynlərə evdə uşaqlara kitab oxumaq vərdişi aşılamağa kömək edəcək. Valideynlər hər gün istisnasız şəkildə uşaqlarına kitab oxumalıdır. Bizim də şüarımız “Gəlin oxuyaq, gəlin paylaşaq” şüarıdır”,- deyə uşaq ədəbiyyatı bölməsinin rəhbəri qeyd edib.

 

TEAS-ın təsisçisi və sədri Tale Heydərov isə bildirib ki, xarici dillərdən akademik nəşrlərin Azərbaycan dilinə yüksək səviyyədə tərcümə edilməsi nəzərdə tutulur: "Biz Azərbaycanı xaricdə təbliğ etməyə çalışırıq. Nəşriyyat Evinin Türkiyədə filialı yaradılıb. Azərbaycan ədəbiyyatı, mədəniyyəti və tarixinə dair 40 kitab ilk dəfə türk dilinə tərcümə edilib və çapa hazırlanıb. Nəşriyyat uşaq ədəbiyyatı sahəsində ciddi dəyişikliyə nail olmağı prioritet kimi qəbul edib. Azərbaycan nağıllarının sonluğundakı 3 alma əsas götürülərək, nəşriyyat evinin tərkibində “3 alma” uşaq ədəbiyyatı bölməsi yaradılıb”.

 

T. Heydərov nəşriyyatın dünyada ən yaxşı nümunələri nəşr edərək, uşaqlara çatdıracağını və bütün uşaq ədəbiyyatı müəllifləri ilə əməkdaşlıq etməyə hazır olduqlarını qeyd edib: "Bu gün "3 alma" Uşaq Nəşriyyatı Evinin yalnız bir hissəsi təqdim olunur. Planlar və görüləcək işlər çoxdur. "3 alma" uşaqlar üçün ədəbi bədii əsərlər, eyni zamanda elmi-populyar əsərlər, dərs vəsaitləri dərc edəcək, bir sözlə dünyada yaxşı nə varsa onun Azərbaycanda da yayılması nail olacaq".

 

Məşhur amerikalı yazıçı və illüstrator Mo Uilyams isə çıxışında Bakıya gəlməyin ən böyük arzularından biri olduğunu nəzərə çatdırıb. Daha sonra o, yaradıcılığından söz açıb və sualları cavablandırıb.

 

Nəşriyyat evində kitabların nəşri zamanı bir çox janrlar və yaş qrupları üzrə maliyyə-qavrama səviyyələri nəzərə alınıb. Kitablar Türkiyədə Avropa standartlarına uyğun nəfis şəkildə çap edilib. Məşhur amerikalı yazıçı və illüstrator, dünyanın ən məşhur uşaq ədəbiyyatı müəllifi Mo Uilyamsın beş şəkilli kitabı Azərbaycan dilinə tərcümə edilib.

 

Mo Uilyams uşaq ədəbiyyatı ilə məşğul olmazdan əvvəl televiziya ssenaristi və animator olub. “Doqquz il Sezam küçəsi” televiziya layihəsində çalışıb, 6 “Emi” mükafatına layiq görülüb. O, “Nickelodeon” və “Cartoon Network” uşaq telekanalları üçün cizgi filmləri çəkib. “TEAS Press” M. Uilyamsı kitab təqdimatına xüsusi qonaq kimi dəvət edib. M. Uilyams Azərbaycanın gənc yazarları, animator və uşaq ədəbiyyatı üzrə ixtisaslaşan naşirlər üçün ustad dərsi keçəcək.

 

Tədbirdə məşhur ingilis yazıçısı və illüstratoru Devid MakKinin 4 kitabı təqdim olunub. Eyni zamanda hollandiyalı yazıçı və illüstrator Hido Van Heynektinin “Riki” və “Maks” kitabları, habelə “TEAS Press” müəllifin “Klavus” nəşriyyatı ilə birgə dizayn etdiyi “Rikki” oyuncaqları təqdim edilib.

 

“Mənim ilk klassik hekayəm” silsiləsindən uşaqlar üçün asan oxunaqlı kitabların təqdimatı da keçirilib. “Capstone” nəşriyyatından alınmış digər silsilə “Sevimli Sevinc” adlanır. Nəşriyyat həmçinin yeniyetmə və orta yaşlı oxucular üçün amerikalı yazıçı Ceff Qunhus tərəfindən yazılmış “Əcinnə ovçuları” seriyasını təqdim edib. Yuxarı yaşlı uşaqlar üçün kitablara “Mənim ilk klassik əsərim” silsiləsi aiddir. Bura “Green Gables malikanəsinin qızı Anni”, “Qara köhlən” və ‘Sirli bağ” əsərləri daxildir.