Moskvada kriminal aləmdə "Rüfət Gəncinski" ləqəbi ilə məşhur olan azərbaycanlı "qanuni oğru" Ülfət Tağıyev saxlanılıb. Kriminal avtoritet Lüblin bazarının ortağı Elxan Əliyevin və iş adamı İlham Əliyevin qətlində təqsirləndirilir. Bu barədə Vesti.az Rusiya mənbələrinə istinadən məlumat verib. Dindirilmə zamanı həmçinin məlum olub ki, saxlanılan şəxs "Ded Xasan" ləqəbi ilə tanınan Aslan Usoyanın qətlində də iştirak edib. Ülfət Tağıyev ötən ilin yanvarında Usoyanın öldürülməsi üçün planı özünün hazırladığını və killerə lazım olan şəraiti yaratdığını etiraf edib. O, bu iş barədə ona heç kəsin sifariş vermədiyini deyib. Qeyd olunur ki, Tağıyev özü də uzun müddət "ştatlı" killer olub. Tutulan kriminal avtoritet başqa bir azərbaycanlı "qanuni oğru" - "Rövşən Lənkəranski" kimi tanınan Rövşən Canıyevin dəstəsində fəaliyyət göstərib. Canıyev isə "Ded Xasan"ın əsas düşməni hesab edilir.