Ermənistan və Azərbaycan qoşunlarının təmas xəttində düşmənin təxribat cəhdinin qarşısını alarkən yaralanan, sonradan müalicəsini davam etdirmək üçün Türkiyəyə yola salınan hərbçilərdən daha biri - Ədalət Məmmədov Bakıya qayıdıb.

 

APA TV-nin məlumatına görə, yaralı hərbiçini Heydər Əliyev Beynəlxalq Hava Limanında Azərbaycan Müdafiə Nazirliyinin nümayəndələri və əsgərin yaxınları qarşılayıblar. Ədalət Məmmədov özünü yaxşı hiss etdiyini deyib: “Hazırda özümü yaxşı hiss edirəm, sağalmışam. Prezident İlham Əliyevə və ölkəmə təşəkkür edirəm”.

 

Yaralı hərbiçinin Bakıda müayinə edildikdən sonra Naxçıvana ailəsinin yanına qayıdıb-qayıtmayacağına gəlincə əsgərin qardaşı Vilayət Məmmədov bildirib ki, bu nazirliyin verəcəyi qərardan sonra məlum olacaq: "Mən özümün və ailəmin adından millətimə, cənəb prezidentimizə minnətdarıq. Qardaşımın arxasında durdular. Onu bizə və vətənə qaytardılar. Hər iki dövlətə təşəkkür edirik".

  

Qeyd edək ki, düşmənin diversiya-təxribat cəhdlərinin və hücumlarının qarşısını alarkən yaralanan əsgərlər Ədalət Məmmədov, Elvin Əsgərov və Sərxan Tahirzadə avqustun 9-da müalicə üçün Türkiyəyə yola salınıb.

 

Əsgərlərin müalicəsini Türk İş Birliyi və Koordinasiya Agentliyi (TİKA) öz üzərinə götürüb. Əsgərlərimizdən Elvin Əsgərov noyabrın 1-də müalicəsini başa vuraraq Azərbaycana qayıdıb.