Gəncədə yolu keçmək istəyən ata və oğulu avtomobil vurub. Hadisə ötən gecə şəhərin Cavad bəy Rəfibəyli küçəsində qeydə alınıb. Gəncə şəhər Baş Polis İdarəsindən APA TV-nin qərb bürosuna verilən məlumata görə, Gəncə şəhər sakini, 1988-ci il təvəllüdlü Alim Musayev idarə etdiyi “VAZ 2107” markalı avtomobillə yolu keçmək istəyən şəhər sakinləri, 1952-ci il təvəllüdlü Aydın Məhərrəmovu və onun oğlu, 1989-cu il təvəllüdlü Muraz Məhərrəmovu vurub. Müxtəlif dərəcəli bədən xəsarətləri alan piyadalar Gəncə şəhər Təcili Tibi Yardım Xəstəxanasına yerləşdiriliblər. Onların vəziyyətinin orta-ağır olduğu bildirilir.

 

Faktla bağlı Gəncə şəhər Baş Polis İdarəsində araşdırma aparılır.