Qəbələnin qədim Nic qəsəbəsində Milad bayramı qeyd olunub

Bütün dünyanın pravoslav xristianları İsa peyğəmbərin mövludu gününü qeyd ediblər. APA TV-nin yerli bürosunun xəbərinə görə, Qəbələnin Nic qəsəbəsində yaşayan udinlər “Cotari” alban kilsəsində təşkil olunan bayram mərasiminə toplaşıblar. Tədbirdə alban-udin icmasının rəhbəri, kilsənin keşişi, və icmanın üzvləri çıxış edərək Milad bayramının mahiyyətindən, dini ayinlərin icrası üçün yaradılan şəraitdən, dövlətin onlara olan diqqət və qayğısından danışıblar. Həmçinin, bayram münasibətilə təbriklər səsləndirilib.

 

Sonra məlumat verilib ki, Nic qəsəbəsində 3 kilsə və iki məscid var. Altı min əhalisi olan qəsəbədə 3700 udin yaşayır. Ümumilikdə isə ölkəmizdə 4000 udin yaşayır ki, onların 300-ü Oğuz və Bakıda qeydiyyatdadır. Dünyada yaşayan udinlərin sayı isə 10 minə yaxındır.

 

Bayram tədbirində qeyd edilib ki, sovet dövründə udinlərə öz bayramlarını qeyd etmək qadağan olunub. Ancaq ölkəmiz müstəqillik əldə etdikdən sonra onlar etnik xalq olaraq bayramlarını hər il qeyd ediblər. Onlara yaradılan imkanların bariz nümunəsi kimi 2002-ci ildə “Cotari“ məbədi əsaslı təmir və bərpa olunaraq udinlərin istifadəsinə verilib. Beləliklə, Nic qəsəbəsi tolerantlığın kiçik modeli hesab edilir. Çıxışlardan sonra kilsədə şamlar yandırılıb, dualar oxunub.

 

Müəllif | Apa.Tv
Elvin Yaqubov