Ötən gecə piyadanın vurulması ilə nəticələnən yol-nəqliyyat hadisəsi baş verib. APA TV-nin məlumatına görə, hadisə Nobel prospektində qeydə alınıb. Suraxanı rayon sakini Elxan İsmayılov idarə etdiyi "Mercedes" markalı avtomobillə yolu keçmək istəyən 45 yaşlı Babazadə Sevda Əli qızını vurub. Hadisə yerinə təcili yardım çağırılıb. Yaralı 1 saylı şəhər kliniki xəstəxanasına çatdırılıb. Olay yerinə Dövlət Yol Polisinin Xətai Rayon Şöbəsinin əməkdaşları gəliblər.

 

Hadisə şahidlərinin APA TV-yə verdiyi məlumata görə, piyada Sevda Babazadə qəfil yola çıxıb. "Mercedes"in sürücüsü qəzadan yayınmaq istəsə də, bu heç cürə mümkün olmayıb.

 

Qeyd edək ki, qəza baş verən yerdən təxminən 100 metr aralıda piyada keçidi yerləşir.

 

1 saylı şəhər kliniki xəstəxanasından verilən məlumata görə, ağır kəllə-beyin tramvası ilə xəstəxanaya gətirilən 45 yaşlı qadının vəziyyəti ağırdır. O, xəstəxananın reanimasiya şöbəsinə yerləşdirilib.

 

Qəza ilə bağlı Nobel prospektində tıxac yaranıb. Qəza törədən maşın cərimə meydançasına aparıldıqdan sonra, yolda nəqliyyatın hərəkəti normala qayıdıb.

 

Faktla bağlı Xətai Rayon Polis İdarəsində araşdırma aparılır.