Bakının Binəqədi rayonu, 28 May qəsəbəsinin İzlivnoy küçəsindəki 16 saylı evdə yaşayan Şirəliyevlər ailəsi üçün bir neçə saatlıq toy əyləncəsi xoşagəlməz sonluqla bitib. APA TV-nin məlumatına görə, onların evdə olmadıqları müddətdə ailəyə məxsus qızıllar oğurlanıb. Ev sahibi Şirəliyev Şirbala Qurban oğlunun dediyinə görə, həyətdə kirayənişin də yaşayır. Ancaq səssiz-səmirsiz gəlib-gedən oğrulardan heç onlar da xəbər tutmayıblar. Baxmayaraq ki, ev sahibinin iti bir neçə dəfə hürərək səs salıb. APA TV-nin xəbərinə görə, oğurluq faktı ilə bağlı ərazi üzrə Binəqədi RPİ-nin 40-cı Polis Bölməsinə də məlumat verilib. Evə baxış keçirən polis əməkdaşları müəyyən barmaq izləri və nümunələr də götürüb. Ailəyə məxsus qızıl-zinət əşyaları, mobil telefon, 100 manat pul və avtomobil qarajındakı avtomobilə aid sənədlər oğurlanıb. Evə soxulan şəxs və ya şəxslərin kimliyi barədə hələlik bir məlumat yoxdur.

 

Faktla Binəqədi RPİ-nin 40-cı Polis Bölməsində araşdırma aparılır.