Çerniqov Vilayət Radası Xocalı soyqırımına qiymət verəcək
Azərbaycanın Xarkovdakı fəxri Konsulluğunun təşkilatçılığı ilə Ukraynanın bir sıra vilayət və şəhərlərində Xocalı soyqırımının 23-cü ildönümü ilə bağlı silsilə tədbirlər başlanılıb. APA TV-nin məlumatına görə, Çerniqov Vilayət Radasında keçirilən ilk anım mərasimdə Xocalı soyqırımının Çerniqov vilayət Deputatlar Şurasının müzakirəsinə çıxarılması ilə bağlı qərar qəbul olunub.
Çerviqov vilayət rəsmilərinin, deputatların, diaspora fəallarının, jurnalistlərin, yerli və xarici tələbələrin iştirak etdiyi anım mərasimini Azərbaycanın Xarkovda fəxri Konsulu Əfqan Salmanov açaraq, ermənilərin son 2 əsrdə Azərbaycanda həyata keçirtdikləri soyqırımı və işğalçılıq siyasətinə dair tarixi faktları açıqlayıb.
Tədbirdə Xocalı soyqırımını əks etdirən sənədli film nümayiş olunub. Çerniqov vilayət Deputatlar Şurasının sədri Nikolay Zverev, tarixçi alım Anatoli Qonçarenko və digər şəxslər ermənilərin Xocalıda uşaqlara, qadınlara, qocalara qarşı həyata keçirtdikləri qəddarlıqların tək bir xalqa qarşı deyil, ümumilikdə, insanlığa yönəlik bəşəri cinayət olduğunu nəzərə çatdırıblar. Natiqlər Azərbaycanın Xarkovdakı fəxri konsulluğunun təşəbbüsü ilə Xocalı soyqırımının Çerniqov vilayət radasında müzakirəyə çıxarılacağını və bu tarixi cinayətə hüquqi siyasi qiymət verilməsi ilə bağlı beynəlxalq təşkilatlara müraciət qəbul olunacağını bildiriblər.
Nikolay Zverev bildirib ki, Xocalı faciəsi adi bir faciə deyil, Azərbaycan xalqına qarşı həyata keçirilmiş əsl soyqırımı siyasətidir. Bu cinayəti törədənlər beynəlxalq məhkəmə qarşısında ən ağır cəzaya məhkum olunmalıdır.
Anim mərasimini diqqət mərkəzində saxlayan yerli televiziya və kütləvi informasiya vasitələri də Xocalı soyqırımı ilə bağlı geniş reportaj və materiallar yayımlayıb, erməni vəhşiliyini vilayət ictimaiyyətinin diqqətinə çatdırıblar.