”OPEK-in noyabrda qəbul etdiyi neft hasilatının səviyyəsini saxlamaq qərarı ABŞ-da şist neftinin hasilatına neqativ təsir göstərir. Bu səbəbdən bazarda xammal çatışmazlığı neftin qəfil bahalaşmasına səbəb ola bilər”. APA TV-nin məlumatına görə, bu fikirləri OPEK rəhbəri Abdulla əl-Bədri söyləyib. Kartel rəhbəri bildirib ki, neft sektoruna investisiya qoyuluşları təxirə salınır, xərclər azaldılır: “Əgər bazara çıxarılan neftin həcmi azalsa, qiymətlər yenidən bahalaşmağa başlayacaq”.

 

OPEK rəhbəri bildirib ki, hasilatı azaltmamaq qərarı konkret heç bir ölkənin, o cümlədən ABŞ-ın şist yanacağı sənayesinə qarşı yönəlməyib. Əl-Bədri bildirib ki, şist yanacağının hasilatı Səudiyyə Ərəbistanından neft çıxarılmasından dəfələrlə baha başa gəlir: “OPEK hasilatı əvvəlki səviyyədə saxlayanda, ABŞ-da şist yanacağı bazarı tənəzzülə uğradı. Birləşmiş Ştatların OPEK-ə üzv olmasına gəldikdə, onlar istəsələr, kartelə üzv ola bilərlər”.

 

OPEK toplantısında iştirakçı dövlətlər neftin ucuzlaşmasına rəğmən hasilatı əvvəlki səviyyədə saxlamaq niyyətlərini ifadə ediblər. Küveytin neft sənayesi naziri Əli Saleh əl-Ömər bildirib ki, neftin bir barelinin qiymətinin 20 dollardan aşağı düşməməsi OPEK üzvləri üçün bir şansdır.

 

Qeyd edək ki, hazırda dünya bazarında “Brent” markalı neftin bir bareli 58 dollardan satılır.