Pakistan prezidenti Məmnun Hüseyn martın 11-də Azərbaycana rəsmi səfərə gəlib. APA TV-nin məlumatına görə, Heydər Əliyev Beynəlxalq Aeroportunda ali qonağı və xanımı Bequm Sahibanı baş nazirin müavini Yaqub Eyyubov və digər rəsmi şəxslər qarşılayıblar. Dövlət başçısını Pakistanın rəsmi şəxsləri və biznesmenlərdən ibarət böyük nümayəndə heyəti müşayiət edir.

 

Qeyd edək ki, Məmnun Hüseyn Azərbaycana prezident İlham Əliyevin dəvəti əsasında səfər edib. Üç günlük səfər zamanı keçiriləcək danışıqlarda əsas diqqət iqtisadiyyat, ticarət, təhsil, müdafiə, elm və mədəniyyət sahəsində əməkdaşlığın inkişafına yönələcək. Danışıqların yekunu olaraq 4 sənəd imzalanacaq. Pakistan prezideninin səfəri zamanı həmçinin biznes forumu keçiriləcək.