Ukraynanın Luqansk vilayətinin separatçıların nəzarətində olan Krasnıy Luç şəhərində azərbaycanlı iş adamı öldürülüb. Bu barədə APA-ya Luqansk vilayəti Azərbaycanlılar Konqresinin sədri Rasim Uğurluyev məlumat verib. O bildirib ki, qətlə yetirilən şəxs Ukrayna vətəndaşı, əslən Azərbaycanın Gəncə şəhərindən olan 1971-ci il təvəllüdlü Rövşən Yusif oğlu Şirinovdur. Martın 11-də axşam saatlarında Rövşən Şirinovun Krasnıy Luç şəhərinin mərkəzindəki evinə 4 maskalı şəxs hücum edib. Maskalılar iş adamının və onun həyat yoldaşının əl-qolunu bağlayıblar. Hadisə zamanı Rövşən Şirinovun 1 yaşlı oğlu da evdə olub. Quldurlar mənzildən 40 min dollara yaxın pulu götürərək iş adamını da özləri ilə aparıblar. Səhəri gün şəhər kənarında Rövşən Şirinovun meyiti tapılıb. Onun başından aldığı güllə yarası nəticəsində öldüyü məlum olub. Hadisəni törədənlərin axtarışına başlanıb və iş adamının yaxınlarına cinayətkarların tapılacağına dair söz verilib. Rövşən Şirinovun cənazəsi dəfn olunmaq üçün martn 13-də Azərbaycana gətiriləcək.