Bayram günlərində Zaqatalanın yollarında reydlər keçirilib
Daxili İşlər Nazirliyinin (DİN) Baş Dövlət Yol Polisi İdarəsinin yol patrul xidməti alayının və Zaqatala rayon Polis Şöbəsinin Dövlət Yol Polisi bölməsinin əməkdaşlarının birgə iştirakı ilə reyd keçirilib. Bayram günləri ərəfəsində rayonlara axın olduğuna görə, bölgələrin magistral yollarında hərəkət intensivləşib. APA TV-nin məlumatına görə, reydin keçirilməsində məqsəd vəziyyətdən sui-istifadə etmək istəyən sürücülərin qanundankənar hərəkətlərinin qarşısının alınması olub. Günorta saatlarından başlayan reyd axşam saatlarına qədər davam edib. Reyd zamanı yol polisi əməkdaşları tərəfindən 50-dən çox sürücüyə inzibati protokol yazılıb. Protokollar əsasən məcburi sğortanın olmaması, təhlükəsizlik kəmərindən istifadə olunmadan avtomobildən istifadə olunması, avtomobilin texniki baxışdan keçirilməməsi hallarına görə tərtib edilib.
Qeyd edək ki, reyddə DİN-nin Baş Dövlət Yol Polisi İdarəsinin şöbə rəisi Kamran Əliyev də iştirak edib. Kamran Əliyevin APA TV-yə verdiyi məlumata görə, reydlər respublikanın əksər rayonlarında aparılır. Dünənki reydlər ölkənin şimal-qərb bölgəsində Zaqatala ilə yanaşı Şəki rayonunda da keçirilib.