"Pakistan İslam Respublikası Senatının Müdafiə Komitəsi Azərbaycanla Dağlıq Qarabağ məsələsində həmrəyliyini bildirən və erməni separatçılarının saxta “seçkilərini” tanımayan bəyanat yayıb".

 

Bunu APA TV-yə Azərbaycanın Pakistandakı səfiri Daşqın Şikarov bildirb: "Bəyanatda Pakistan Senatının Müdafiə Komitəsi Azərbaycan Respublikasının Dağlıq Qarabağ bölgəsində 3 may 2015-ci il tarixində separatçı rejim tərəfindən qondarma “parlamentə” keçirilməsi nəzərdə tutulan qanunsuz seçkiləri qəti şəkildə pislədiyini bildirib. Bəyanatda qeyd olunub ki, Azərbaycanla dost və qardaşlıq münasibətlərdə olan Pakistan hökuməti və xalqı Dağlıq Qarabağ məsələsində Azərbaycanı tam dəstəkləyir və həmrəyliyini bildirir, Ermənistanın qanunsuz işğalını tam pisləyir. Azərbaycanın ərazi bütövlüyü və suverenliyini dəstəkləyən, işğalı pisləyən BMT Təhlükəsizlik Şurasının 822, 853, 874, 884 saylı qətnamələrinin icra olunmalı, qanunun aliliyi təmin edilməli, işğal dayandırılmalıdır”.

 

Diplomat bunu Azərbaycanın xarici siyasətinin uğuru kimi qiymətləndirib: "Pakistan senatının qəbul elədiyi bu qərar Azərbaycan Prezidenti İlham Əliyevin apardığı uğurlu xarici siyasətin nəticəsidir ki, bu gün 200 milyonluq əhalisi olan, nüvə dövləti olan Pakistan Dağlıq Qarabağda keçirilən qondarma seçkiləri qətiyyətlə pisləyir və bəyanat qəbul edir".

 

Bəyanatda vurğulanıb ki, Pakistanın bütün əyalətlərinin və əsas siyasi partiyalarının təmsil olunduğu Senatın Müdafiə komitəsi bütün Azərbaycan xalqı, xüsusilə də işğal olunmuş ərazilərdən olan azərbaycanlılarla həmrəy olduğunu bir daha bildirir, “zorun aliliyi” prinsipini qəbul etməyərək, beynəlxalq hüquq, BMT-nin nizamnaməsi və qəbul edilmiş qətnamələr əsasında münaqişənin sülh yolu və ümumbəşəri ədalət normaları əsasında həll edilməsini dəstəkləyir.