Azərbaycanda səfir dünyasını dəyişdi
Latviyanın Azərbaycandakı səfiri Hardis Baumanis Bakıda dünyasını dəyişib.
Bu barədə APA TV-yə teleaparıcı, Latviya səfirliyi ilə əməkdaşlıq edən Emin Musəvi məlumat verib.
Onun sözlərinə görə, latviyalı diplomat aprelin 6-da vəfat edib. Emin Musəvi deyib ki, Hardis Baumanis ölkələrimiz arasında əlaqələrin inkişafında böyük rol oynayıb.
Hardis Baumanis fəaliyyətini Latviya XİN-də davam etdirmək üçün yayda ölkəsinə dönməli imiş.
1967-ci ildə anadan olan Hardis Baumanis Azərbaycandan əvvəl Litvada səfir və Rusiyanın Sankt-Peterburq şəhərində baş konsul vəzifələrində çalışıb.
Səfirin vəfatını Latviya XİN də təsdiqləyib. Xarici işlər naziri Edqars Rinkeviçs diplomatın ölümü ilə əlaqədar Twitter vasitəsilə başsağlığı verib.
APA TV-nin əldə etdiyi məlumata görə, Hardis Baumanisin cənazəsinin ölkəsinə yola salınması vaxtı ilə bağlı qərar bu gün veriləcək. Ötən axşam meyit məhkəmə-tibb ekspertizası tərəfindən müayinə olunub.