Heydər Əliyev prospektinin Böyükşor qovşağından Heydər Əliyev Mərkəzinin qarşısına qədər olan hissəsində yolun təmirinin tez bir zamanda başa çatdırılması üçün Nəqliyyat Nazirliyi "Azəryolservis" ASC işləri davam etdirir.

 

Qurumdan APA TV-yə verilən məlumata görə, təmirin aparılmasında əsas məqsəd I Avropa Oyunlarına hazırlıq dövründə Heydər Əliyev prospektinin görkəmini daha da yaxşılaşdırmaqdır.

 

Təmir işləri çərçivəsində asfalt-beton örtüyünün üst qatının götürülərək yenisi ilə əvəzlənməsi, səki daşlarının dəyişdirilməsi, ayrıcı zolağa tamet daşının döşənməsi, zəruri olan ərazilərdə yağış-kanalizasiya sisteminin yenidən qurulması, kommunikasiya quyularının dəmir-beton piltələrinin və baxış qapaqlarının dəyişdirilməsi, yerüstü piyada keçidinin rekonstruksiyası və s. işlər aparılır. Artıq 5 kilometrlik hissənin 1800 m hissəsinə asfalt-beton örtük döşənib, 1 km hissədə yolun hərəkət hissəsinin üfüqi nişanlanması başa çatdırılıb.