İraq ordusu İŞİD terror qruplaşmasına qarşı yeni əməliyyata başlayıb.

 

APA TV-nin məlumatına görə, Tikrit şəhərini azad edən İraq ordusunun yeni hədəfi terrorçuların nəzarət etdiyi Ənbar əyalətidir. İraq hökumətindən verilən açıqlamada deyilir ki, ordu Ənbar əyalətinin şərqindəki rayonları azad etmək üçün hücuma keçib.

 

İraq hökuməti əyalətin inzibati mərkəzi olan Ər-Ramadi şəhərində komendant saatı rejimi tətbiq edib. Bu, beynəlxalq koalisiya qüvvələrinin İŞİD mövqelərinə hava zərbələrinin endirildiyi vaxtla üst-üstə düşür.

 

Qeyd edək ki, ilk geniş miqyaslı hərbi əməliyyat Tikrit şəhərində aparılıb. Beynəlxalq koalisiyanın aviasiyasının dəstəklədiyi İraq ordusu Tikriti yalnız bir ay davam edən ağır döyüşlərdən sonra geri ala bilib.