Azərbaycan Dövlət İnformasiya Agentliyi (“AzərTAc”) və Yaponiyanın JIJI PRESS informasiya agentliyi arasında əməkdaşlıq haqqında saziş imzalanıb.

 

APA TV-nin xəbərinə görə, “AzərTAc”ın baş direktoru Aslan Aslanov və JIJI PRESS agentliyinin icraçı direktoru Sadafumi Tani tərəfindən imzalanan sazişə əsasən tərəflər arasında əməkdaşlıq əlaqələrinin genişləndirilməsi, təcrübə mübadiləsi məqsədilə qarşılıqlı səfərlərin təşkili nəzərdə tutulub.

 

Eyni zamanda saziş nəticəsində agentliklərin saytlarında Azərbaycan və Yaponiyada baş verən hadisələr barədə informasiyalar yerləşdiriləcək. “AzərTAc”ın baş direktoru Aslan  Aslanov bildirib ki, saziş Azərbaycan həqiqətlərinin Yaponiyanın JIJI PRESS agentliyi vasitəsilə təbliği baxımından xüsusi əhəmiyyətə malikdir: “Biz bu sazişi yüksək qiymətləndiririk. Tam əminliklə deyə bilərəm ki, bu saziş Azərbaycan və Yaponiya xalqları arasındakı əlaqələrin daha da möhkəmləndirilməsində çox böyük əhəmiyyətə malik olacaq. Azərbaycanla Yaponiya arasında bütün sahələrdə əməkdaşlıq sürətlə inkişaf edir. “AzərTAc”ın Yaponiya kütləvi informasiya vasitələri ilə yaxşı əlaqələri var”.

 

JIJI PRESS-in icraçı direktoru Sadafumi Tani çıxışında Azərbaycanın son illərdə əldə etdiyi uğurlar haqda danışıb: “Müqaviləni imzalamaq üçün sizinlə birlikdə olmaq bir şərəfdir. Azərbaycan son illər regionda uğurla inkişaf edən ölkədir. Bildiyimə görə, 2013-cü ildə Azərbaycanda inflyasiya 2,3 faiz olub. Azərbaycanda qiymətlər çox stabildir. Bu çox nadir haldır. Mən sizə söz verirəm ki, JIJI PRESS Azərbaycanın bütün informasiyalarını yayacaq. Ümid edirəm ki, “AzərTAc” da öz növbəsində bizim informasiyaları yayımlayacaq. Biz bu əməkdaşlıqla ölkələrimiz arasındakı əlaqələrə öz töhfəmizi verəcəyik".

 

Məlumat üçün bildirək ki, bu il “AzərTAC” 95 illiyini, JIJI PRESS isə 70 illik yubileyini qeyd edir.