"Eurovison 2012" mahnı müsabiqəsinin keçirildiyi Bakı Kristal Zalı artıq öz yerini Bakı 2015 İlk Avropa Oyunlarına verib.

 

Bakı 2015 İlk Avropa Oyunlarının bəzi yarışları Bakı Kristal Zalında keçiriləcək. Bunun üçün Kristal Zal 3 hissəyə bölünüb və 5 idman növü üzrə yarışlar təşkil olunacaq. Birinci hissədə voleybol, zalın ikinci hissəsində boks yarışları keçiriləcək. Burada 2 min yerlik tamaşaçı tutumu var. Qeyd edim ki, bu hissə yarışların keçirilməsi üçün tam hazırdır. Boks yarışları iyunun 16-dan başlayacaq. Zalın üçüncü hissəsində isə karate, taekvondo və qılıncoynatma yarışları təşkil olunacaq.

 

Zalda keçiriləcək oyunlar iyunun 16-dan başlayaraq 16 gün davam edəcək. Burada boks üzrə sınaq yarışı keçirilsə də, qılıncoynatma, karate, taekvondo və voleybol üzrə sınaq yarışları gələn həftədən başlayacaq. Belə ki, mayın 9-u və 10-u qılıncoynatma, 18-i karate, 21-i taekvondo 24 isə voleybol üzrə ilk sınaq yarışları baş tutacaq.

 

Bakı Kristal Zalının baş meneceri Ben Emerton bildirib ki, 16 gün ərzində keçiriləcək yarışlara ümumilikdə 19 500 tamaşaçının gəlməsi gözlənilir: "Voleybol üzrə yarışın keçiriləcəyi zalda tamaşaçı tutumu 4 min, boks üçün orta tamaşaçı tutumu 2 min, karate, taekvando üçün 1500, qılıncoynatma üçün 1000 nəfərlik tamaşaçı tutumu var. Ümumilikdə Bakı Kristal Zalında işçi heyətinin sayı 3 mindən çoxdur".

 

Qeyd edək ki, Bakı Kristal Zalında artıq son tamamlama işləri aparılır.