I Avropa Oyunlarının məşəli  Füzuli rayonunun Horadiz şəhərinə gətirilib.

 

APA TV-nin Qarabağ bürosunun xəbərinə görə, paytaxtdakı qədim od məbədi Atəşgahda alovlandırılan məşəl Horadiz şəhərində Bayraq Meydanında qarşılanıb.

 

Məşəli qəbul edən Füzuli rayonu Qazaxlar kənd orta məktəbinin müəllimi Atamoğlan Qəhrəmanov 10 nəfər həmkarı ilə birgə yürüşü davam etdirib. 4300  metr məsafədə rəmzi növbə ilə bir-birinə ötürən müəllimlər məşəli Bayraq Meydanından Heydər Əliyev prospekti boyunca Heydər Əliyev meydanına çatdırıblar. Horadiz şəhər 3 saylı orta məktəbin idman müəllimi Rövşən Ələsgərov məşəli meydanda qurulan səhnəyə qaldırıb.

Daha sonra simvolik çıraq alovlandırılaraq festivala start verilib.