Bu gün Azərbaycan Milli Olimpiya Komitəsinin inzibati binasında Bakı-2015 I Avropa Oyunlarının mükafatçıları ilə görüş keçirilib.

 

APA TV-nin məlumatına görə, gənclər və idman naziri Azad Rəhimov, MOK-un vitse-prezidentləri Çingiz Hüseynzadə, Xəzər İsayev, baş katibi Ağacan Abıyev, Güləş Federasiyasının vitse-prezidenti Namiq Abdullayevin iştirak etdiyi görüşə yarışın III günündə, yəni iyunun 14-də fəxri kürsüyə çıxan idmançılar qatılıblar.

 

MOK rəsmiləri qızıl mükafatçılar Elvin Mürsəliyev (yunan-Roma güləşi, 75 kq), Ayxan Mamayev (karatenin kumite növü, 84 kq) və İrina Zaretskaya (karatenin kumite növü, 68 kq), həmçinin bürünc mükafatçılar Həsən Əliyev (yunan-Roma güləşi, 66 kq) və Rostislav Pevtsovu (triatlon) mükafatlandırıblar. Yalnız gümüş medal qazanan Sabah Şəriəti (yunan-Roma güləşi, 130 kq) tədbirə qatılmayıb.

 

Çingiz Hüseynzadə mükafatçıları təbrik etdikdən sonra sözü Azad Rəhimova verib. Nazir Azərbaycan idmançılarının indiyədək göstərdikləri nəticələrdən məmnun qaldığını bildirib: “Qürur hisslərimi sizinlə bölüşürəm. Şadam ki, idmançılarımız böyük nailiyyətlər əldə edirlər. Açığı, biz bu qədər qızıl medal gözləmirdik. Triatlon yarışını qeyd etmək istərdim. Bu idman növü bizdə o qədər də populyar deyil. Buna baxmayaraq, idmançımızın bürünc medal qazanması sevindirici haldır. Hazırda komanda hesabında birinci yerdəyik. Düzdür, gələcəkdə lider dəyişə bilər. Amma 3 gündən sonra birinci yerdə qalmağımız böyük nəticə deməkdir".

 

Yüksək vəzifəli qonaqların artıq ölkəmizi tərk etdiklərini deyən nazir bildirib ki, gələn qonaqlar təşkilatçılıqdan razı qalıblar və belə təşkilatçılıq gözləmədiklərini deyiblər: "Biz göstərdik ki, Azərbaycan idman ölkəsidir, böyük tədbirlər qəbul etməyə hazırdır. İdmançılarımızdan bu gün və sabah da medallar gözləyirik. Komanda bir ürək kimi döyünür. Medalçılarımızı bir daha təbrik edirəm, qarşıdakı günlərdə yarışacaq idmançılara uğurlar arzulayıram".

 

Tədbirin yekununda medalçılar xüsusi şərəf lövhəsinə imza atıblar və onlara hədiyyələr təqdim olunub. Həmçinin medalçıların şərəfinə tort kəsilib.

 

Daha sonra qalibiyyət əldə edən idmançılar və onların məşqçiləri ümummilli lider Heydər Əliyevin abidəsini ziyarət edib, abidə önünə gül dəstələri qoyublar.