“Avropa Oyunları çərçivəsində iyunun 18-də 14 mәkanda yarışlar keçirilib”.

 

APA TV-nin mәlumatına görә, bunu Bakı-2015 Avropa Oyunları Əməliyyat Komitəsinin əməliyyatlar üzrə baş direktoru Saymon Kleq deyib.

 

O bildirib ki, 18 iyunda keçirilən yarışları 30 min tamaşaçı izləyib: “Dünәn gülәş üzrә son yarışlar keçirilib. Bu gün şәhәrin mәrkәzindә bәzi yollar bağlanacaq. Velosipedçilәr yollarla tanış olacaqlar. Sabah qadınlar arasında velosiped yarışları başlayacaq. Bu gün 12 idman növü üzrә yarışlar olacaq”.

 

Saymon Kleq yarışlara biletlәrin tapılmaması, lakin stadionlarda boş yerlәrin qalması mәsәlәsinә də aydınlıq gәtirib. Onun sözlәrinә görә, bәzәn tamaşaçılar bilet alırlar vә gәlmirlәr, bәzәn isə stadionlara qısamüddәtli qatılırlar: "Bəzi insanlar bilet almaq istәyir, ancaq ala bilmir. Televiziyaya baxanda görürlәr ki, boş yerlәr var. Mövcud biletlәri tәkrar sata bilmәrik. Açıq hava yarışlarında insanlar çox qalmırlar. Hәmin yerlәr üçün tәkrar bilet satmaq imkanı yoxdur. Kimsә bilet almaq istәyir, amma mümkün olmur. Tәəssüf ki, biletlәr satılmış olur”.

 

Saymon Kleq Avropa Oyunlarının birinci hәftәsinin gözlәnildiyi kimi keçdiyini söyləyib: “Bu, son 30 ayda aparılan planlaşdırmanın nәticәsidir. Bәzәn gündәlik xırda çәtinliklәr olur. Lakin bunlar böyük vә әhәmiyyәtli deyil. Ev sahibi olan ölkәnin nümayәndәlәrinin yarışlarda yüksәk nәticәlәri ab-havaya müsbәt tәsir edir. Tamaşaçı iştirakından mәmnunam".

 

I Avropa Oyunları Əməliyyat Komitəsinin rəsmisi deyib ki, bilet satışından әldә olunan gәlir oyunların tәşkilindә әsas komponent deyil: "Biletlәr ucuzdur. Bәlkә də insanları cәlb edәn әsas sәbәb budur".