Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) əməliyyat qrupu Lənkəran şəhərində keçmiş Sovet ordusuna məxsus hərbi hissələrin ərazisində minatəmizləmə əməliyyatları aparır.

 

APA TV-nin cənub bürosunun məlumatına görə, şəhərin mərkəzində yerləşən keçmiş hərbi hissənin, habelə dəniz sahilində əvvəllər mövcud olmuş tank taborunun ərazisində əməliyyatlar davam edir. Bu günədək şəhərin içərisində yerləşən hərbi hissədə 6 ədəd partlamamış müxtəlif növ minaatan və top mərmiləri, 500 ədəd müxtəlif çaplı patron tapılaraq zərərsizləşdirilib

 

ANAMA-nın cənub bölgəsi üzrə  əməliyyat meneceri Böyükağa Haqverdiyevin sözlərinə görə, dənizkənarı ərazidə hələ də ləpələrin sahilə çıxardığı minalar tapılır. Bununla əlaqədar olaraq həmin sahilyanı ərazilər təhlükəsizlik üçün çəpərlənib. Hərbi hissənin ərazisində işlər yekunlaşdıqdan sonra dəniz sahili ərazidə təmizlənmə işləri həyata keçiriləcək.

 

Qeyd edək ki, ölkənin cənub zonasında ayrı-ayrı ərazilərin minalardan əsaslı təmizlənməsi tədbirlərinin 2016-cı ildə həyata keçirilməsi nəzərdə tutulub.